काठमाडौं महानगरपालिकाका मेयर बालेन शाह मंगलबार राति लन्डन पबमा देखिए । लन्डन पब त्यही हो, जसलाई केही समयअघिमात्रै उनले खाली गराएका थिए ।

महानगरले भवनको नक्सा विपरीत प्रयोजनमा लगाइएको बेसमेन्ट खाली गराउने क्रममा दरबारमार्गको लण्डन पब पनि हटाएको थियो ।

लण्डन पब हटाउन मेयर बालेन आफै ८ भदौमा आफैं डोजर लिएर पुगेका थिए । डोजरले केही भाग भत्काएर तुरुन्तै हटाउन निर्देशन दिएपछि यो पब नै केही समय बन्द हुन पुग्यो । त्यही पबमा मेयर बालेन मंगलबार राति श्रीमती सबिनासँग रोमान्टिक मूडमा देखिएका छन् । श्रीमतीको हात समाएर निकै रोमान्टिक अन्दाजमा देखिएका बालेनको तस्बीर अहिले सामाजिक सञ्जालमा भाइरल भएको छ ।

लण्डन पबको सामाजिक सञ्जालमा बुधबार बालेन नाचेको भिडियो र फोटो पोष्ट भएपछि पबसँग बालेनको कुनै समझदारी भएको त होइन भन्ने प्रश्न समेत उठिरहेका छन् । तर वास्तविकता अलि फरक छ ।

बालेनका प्रमुख स्वकीय सचिव भुपदेव साहका अनुसार महानगरले डोजर लगाएपछि लण्डन पब त्यहाँबाट सरेको छ । हाल लण्डन पब किंग्स लाउञ्जको छेउमा सञ्चालनमा आएको छ । नयाँ ठाउँमा सञ्चालनमा आएको लण्डन पबमा मंगलबार राति बालेन एक कार्यक्रममा पुगेका हुन् ।

‘यो काठमाडौं महानगरपालिकाले कानुन अनुसार चलेको व्यवसायीहरुलाई सम्मान गर्छ भन्ने उदाहरण पनि हो ।’ उनले भनेका छन् ।

प्रकाशित समय : ११:०४ बजे