बिहीबार बिहान ११ बजेदेखि राति १० बजेसम्म बैठक बस्दा पनि भागबण्डा टुंगो नलागेपछि गठबन्धनको बैठक आज फेरि बस्दैछ ।

पाँचदलीय सत्ता गठबन्धनलाई प्रतिनिधिसभातर्फका १ सय ६५ सिट भागबन्डा गर्न निकै सकस परेको हो । निर्णायक बैठक भनेर बिहीबार बिहान ११ बजेदेखि बसेको गठबन्धनको शीर्ष बैठक राति १० बजेसम्म चलेको थियो ।

नेताहरूले सहमतिनिकट भनेर प्रतिक्रिया दिए पनि बैठकमा संख्याकै विषय पेचिलो बनेको थियो । बैठकको सुरुवातदेखि नै कांग्रेसले कति सिट लिने र बाँकी दललाई कति छुट्याउने भन्ने प्रस्तावकै वरिपरि छलफलकेन्द्रित भएको थियो ।

बालुवाटार स्रोतका अनुसार कांग्रेसले सय सिट दाबी गरेर ९० सिटको बटमलाइन अघि सारेको छ । लोकतान्त्रिक समाजवादी पार्टी (लोसपा)लाई त्यसमध्येबाटै केही सिट छुट्याउने गरी कांग्रेसले उक्त बटमलाइन राखेको हो ।

७५ सिटमा अन्य दललाई मिलाउन प्रधानमन्त्री देउवाले माओवादी अध्यक्ष दाहाललाई आग्रह गरेका थिए । तर दाहालले ५० प्रतिशत कांग्रेसले राखेर बाँकी अन्य दललाई छाड्न आग्रह गरे । कांग्रेसलाई ५० प्रतिशत दिन एकीकृत समाजवादीका अध्यक्ष नेपाल भने तयार थिएनन् ।

एकीकृत समाजवादीका अध्यक्ष नेपालले भने कांग्रेसलाई ७० सिट मात्र लिन प्रस्ताव गरेका छन् । अरु सिट गठबन्धनमा सहभागी दलहरुमा भागवण्डा गर्ने उनको प्रस्ताव छ । कांग्रेसलाई ७० सिटमा झार्न सके आफ्नो दलले कम्तिमा २५/३० सिटसम्म पाउन सक्ने समाजवादीका नेताहरुको बुझाइ छ । पार्टी विभाजन गरेर जोखिम मोलेको तर्क अघि सार्दै उनले आफ्नो पार्टीले २५/३० सिट पाउनुपर्ने तर्क गरे ।

बैठकमा माओवादीले ६० र एकीकृत समाजवादीले ४० सिटको प्रस्ताव गरेका थिए । जसपाले २५ र राष्ट्रिय जनमोर्चाले २ सिटमा दाबी गरेका छन् । जनता समाजवादी पार्टीका अध्यक्ष उपेन्द्र यादवले भने आफ्नो दलले २२/२५ सिट पाउनुपर्ने अडान राखेका छन् । १२/१५ सिट लिने हो भने तालमेल गर्नुको कुनै अर्थ नहुने उनको तर्क छ ।

राष्ट्रिय जनमोर्चाका अध्यक्ष चित्रबहादुर केसीले पनि बाग्लुङ र प्युठान नपाउने हो भने गठबन्धन गर्नुको अर्थ नहुने बताएपछि कांग्रेस नेता अलमलमा परेका छन् ।

प्रकाशित समय : ०७:५२ बजे