प्रधानमन्त्री तथा कांग्रेस सभापति शेरबहादुर देउवाले पार्टी कार्यसम्पादन समितिको बैठक बोलाएका छन् । शनिबारका लागि कार्यसम्पादन समितिको बैठक बोलाइएको हो ।

पार्टी केन्द्रीय कार्यालयका मुख्य सचिव कृष्णप्रसाद पौडेलले कार्यसम्पादन समितिको बैठक बोलाइएको जानकारी दिए । उनका अनुसार चुनावको तयारी सम्बन्धमा छलफल गर्न बैठक बोलाइएको हो ।

पाँचदलीय गठबन्धनको नेतृत्व गरेर कांग्रेस ४ मंसिरको चुनावमा होमिँदै छ । गठबन्धन दलबीच सिट बाँडफाँटका लागि गठन गरिएको कार्यदलले पनि काम सुरु गरिसकेको छ ।

कार्यदलको ३० साउनमा बस्ने बैठकमा दलहरुले सिट संख्या नै दाबी गर्ने तयारी गरेपछि शनिबार कार्यसम्पादन समितिको बैठकमा कांग्रेसले दाबी गर्ने सिट संख्याबारे पनि छलफल हुने जनाइएको छ । देशभरका १६५ सिटकै अवस्था विश्लेषण गरेर कांग्रेसले सिट दाबी गर्ने तयारी गरेको छ ।

प्रकाशित समय : १९:१२ बजे