विगतका वर्षहरुमा असोज लागेपछि पश्चिमी सीमा नाका गौरीफन्टा र गड्डाचौकी भएर स्वदेश फर्किने नेपालीहरुकोे लर्को हुन्थ्यो । वर्षभरि मुग्लानमा पसिना बगाएका नेपालीहरु दशगजामा पुग्दा दंग हुन्थे । तर, अहिले ती सुदूरपश्चिमका अनुहार र पश्चिमी सीमा नाकाको दृश्य फेरिएको छ ।

अहिले स्वदेश फर्किनेको संख्याभन्दा रोजगारीका लागि भारत जाने नेपालीको संख्या चार गुणा बढी छ । कोरोना भाइरसको प्रभावले छाक टार्न मुस्किल भएपछि भारत जाने नेपालीको लर्काे छ । केही समय पहिले कोरोना महामारीमा भारतबाट ज्यान जोगाउन नेपाल आएका नेपालीहरु यति बेला भोकले ज्यान जान थालेपछि पुन: रोजगारीका लागि भारत जान बाध्य छन् ।

देशमा रोजगारीको गतिलो माध्यम नभएपछि पेट पाल्नकै लागि भए पनि भारत जानु सुदूरपश्चिमका नागरिकको बाध्यता छ । कोरोनाकै प्रभावका बीच केही महिना पनि घर फर्किएका उनी अहिले पुन त्रिनगर–गौरीफन्टा नाका भएर भारत गइरहेका छन् ।

कैलालीको लम्कीका लोकेश विष्ट तीन महिनाअघि भारतमा कोरोना महामारी देखिएपछि स्वदेश फर्केका थिए । १४ दिन क्वारेन्टिन बसेर घर गएका बिष्ट फेरि कोरोना महामारीकै बीच भारत जान थालेका हुन् । नेपालमा कुनै विकल्प नभएपछि भारत जानु आफ्नो बाध्यता भएको उनले बताए ।

अहिले कहिल्यै भारत नगएका सुदूरपश्चिमबासी पनि रोजगारीका लागि भारत जान बाध्य भएका छन् । नेपालीको महान् चाड दशैं आउन एक महिना मात्र बाँकी रहेका बेला रोजगारीकै लागि भारत जान लागेको कैलालीका अर्जुन विष्ट पनि भारतमा कोरोना महामारीकै कारण स्वदेश फर्केका थिए । घरमा ६ जनाको परिवारलाई भारतमै रोजगारी गरेर पालिरहेका बिष्टलाई तीन महिना बेरोजगार भएर घरमा बस्नुपर्दा परिवार पाल्न निकै मुस्किल प-यो । तीन महिना घरमा बस्दासम्म कुनै तहबाट रोजगारीको आश्वासनसमेत नपाएपछि उनी फेरि भारत जान लागेका हुन् ।

दशैं नजिकै आउदै गरेको भए पनि दैनिकी चलाउनै मुस्किल हुन लागेपछि भारत गइरहेको छु,’ उनले भने, ‘स्थानीय र प्रदेश सरकारले रोजगारीको वातावरण बनाउँला भन्ने विश्वास छैन ।’ त्यही भएर भए पनि भारत जानुको विकल्प नभएको उनले गुनासो गरे ।

गत चैतदेखि सुरु भएको कोरोना भाइरसको प्रभावका कारण लाखौं सुदूरपश्चिमबासी स्वदेश फर्किएका थिए । कतिपय कोरोनाको त्रासले फर्किएका थिए भने कतिपय रोजगारी गुमेपछि घर आएका थिए । झण्डै चार/पाँच महिनाको स्वदेश बसाइपछि घर खर्च चलाउनसमेत नसकिने भएपछि फेरि पनि भारत जानु परेको कञ्चनपुरका जगदीश नाथले गुनासो गरेका छन् ।

भारत नगएपछि उनको ७ जनाको परिवार भोकले मर्ने चिन्ता यति बेला उनलाई परेपछि चाडपर्वको मुखमा उनी पुनः भारत जान बाध्य छन् । असोज सुरु भएपछि मात्र गौरीफन्टा नाका भएर झण्डै ७ हजार प्रदेशबासी भारत परेका छन् । सशस्त्र प्रहरीको तथ्यांकअनुसार असोज १ गते पाँच सयभन्दा बढी, २ गते नौ सयभन्दा ६४ जना, ३ गते ९४६ जना, ४ गते एक हजार ३६ जना, ५ गते एक हजार २८७ जना र ६ गते एक हजार ६०९ जना ७ गते एक हजारभन्दा बढी सुदूरपश्चिमेलीहरु भारत पसेका छन् ।

धनगढी उपमहानगरपालिका सीमा हेल्थ डेस्क प्रमुख दिनेश ठकुल्लाले २ साता यता भारत जाने नेपालीको संख्या उच्च रहेको बताए । उनका अनुसार विश्वमा कोरोना भारइसको महामारी सुुरु भएपछि रोजगारीका लागि भारतलगायत अन्य मुलक रहेका धेरै नेपाली स्वदेश फर्किएका थिए ।

प्रकाशित समय : १५:३९ बजे