गृहपृष्ठ पेट्रोलियम पदार्थको तारन्तार मूल्यवृद्धि
पेट्रोलियम पदार्थको तारन्तार मूल्यवृद्धि
हालै मात्र कर्मचारीलाई महिनौँ अवधिको बोनस बाँडेको नेपाल आयल निगमले घाटा देखाउँदै एक महिनामै तीन पटक पेट्रोलियम पदार्थको मूल्य बढाएको छ । निगमले ध्यरातदेखि लागू हुने गरी भन्दै सोमबार फेरि मूल्य बढाएको हो ।
निगमका प्रवक्ता विनितमणि उपाध्यायका अनुसार पेट्रोल, डिजेल र मट्टितेलमा प्रतिलिटर दुई रुपैयाँका दरले मूल्यवृद्धि गरिएको छ । नयाँ मूल्यअनुसार पेट्रोल अब प्रतिलिटर ११६ तथा डिजेल र मट्टितेल प्रतिलिटर ९९ रुपैयाँ कायम भएको छ ।
यस्तै हवाई इन्धन आन्तरिक उडानतर्फ साविकको प्रतिलिटर बिक्री मूल्यमा पाँच रुपैयाँले वृद्धि गरी ७२ रुपैयाँ पु‑याइएको छ । हवाई इन्धन अन्तर्राष्ट्रियतर्फ प्रतिकिलोलिटर २५ अमेरिकी डलरले वृद्धि गरी ८९३ प्रतिकिलोलिटर कायम गरिएको छ ।
खाना पकाउने एलपी ग्यासको खुद्रा मूल्य भने यथावत् राखिएको निगमले जनाएको छ । मूल्य समायोजनपछि पनि निगमलाई पेट्रोलमा प्रतिलिटर आठ रुपैयाँ ४२ पैसा, डिजलमा प्रतिलिटर ६ रुपैयाँ ५६ पैसा र एलपी ग्यासमा प्रतिसिलिन्डर ३९२ रुपैयाँ ८२ पैसा घाटा रहेको निगमको दाबी छ । यसले निगमको अर्धमासिक घाटा करिब एक अर्ब ३२ करोड हुन आउँछ ।
निगमले यसअघि फागुन ४ गते पनि पेट्रोलियम पदार्थमा मूल्यवृद्धि गरेको थियो । इन्डियन आयल कर्पोरेसनले आज पठाएको मूल्यसूचीअनुसार मूल्य समायोजन गरिएको निगमले जनाएको छ ।
निगमले मूल्य बढ्दा तत्कालै बढाउने गरे पनि घट्दा घटाउने गरेको छैन । पेट्रोले बेचेर घाटा व्यहोरिरहेको निगमले कर्मचारीलाई कसरी करोडौँ बोनस बाँड्यो भन्ने प्रश्न उत्तर भने दिएको छैन ।
प्रकाशित समय : १२:०८ बजे