काठमाडौँ- सामसङ नेपालले ग्यालेक्सी ए५७ फाइभ जी र ग्यालेक्सी ए३७ फाइभ जी सार्वजनिक गरेको घोषणा गरेको छ । नयाँ ए श्रृङ्खलाका यी मोडेलहरूले उन्नत क्यामेरा, स्मार्ट विशेषता र आकर्षक बनावटमार्फत दैनिक प्रयोगलाई अझ सहज बनाउने लक्ष्य राखेका छन् ।

कम्पनीले यसअघि उपलब्ध १२ महिनाको किस्ता योजनालाई विस्तार गर्दै २४ महिनासम्मको किस्ता सुविधा ल्याएको छ । यस सुविधामार्फत महँगो प्रविधिलाई सर्वसाधारणका लागि अझ पहुँचयोग्य बनाउने उद्देश्य लिइएको छ । यो सेवा सामसङ इन्स्टा फाइनान्स अन्तर्गत हुलास फिन सर्भ हायर पर्चेज लिमिटेडमार्फत उपलब्ध हुने जनाएको छ । यसका लागि प्रक्रिया सरल रहेको र नागरिकता मात्र भए पुग्ने बताइएको छ ।

नयाँ ग्यालेक्सी ए श्रृङ्खलामा सामसङको नवीनतम प्रविधि समावेश गरिएको छ, जसमा उन्नत कृत्रिम बुद्धिमत्ता प्रणाली रहेको छ । यसले स्मार्ट अन्तरक्रिया, उत्पादकत्व वृद्धि तथा सामग्री निर्माणलाई सहज बनाउने काम गर्छ ।

यसमा रहेको ध्वनि रूपान्तरण सुविधाले रेकर्ड गरिएको आवाज, फोन वार्ता र सन्देशलाई अक्षरमा परिवर्तन गर्न सहयोग गर्छ । त्यस्तै, पर्दामा देखिएका सामग्रीलाई छिटो चयन गर्ने, निकाल्ने र एक अनुप्रयोगबाट अर्कोमा सार्ने सुविधा पनि उपलब्ध छ ।

फोटो सम्पादनका लागि वस्तु हटाउने, छान्ने र सुधार सुझाव दिने जस्ता विशेषताहरू पनि समावेश छन् । ग्यालेक्सी ए५७ फाइभ जी मा उत्कृष्ट अनुहार चयन र स्वतः सम्पादन जस्ता थप सुविधा पनि राखिएको छ ।

दुवै उपकरणमा ५० मेगापिक्सेलको मुख्य क्यामेरा सहित तीन क्यामेरा व्यवस्था गरिएको छ, जसले विभिन्न प्रकाश अवस्थाहरूमा स्पष्ट र गुणस्तरीय तस्बिर लिन सहयोग गर्छ । न्यून प्रकाशमा पनि उज्यालो र स्वाभाविक तस्बिर तथा भिडियो लिन सकिने व्यवस्था गरिएको छ ।

उपकरणहरूमा उन्नत प्रशोधन प्रणाली प्रयोग गरिएको छ, जसले बहुकार्य सञ्चालन, भिडियो हेर्ने र सामग्री निर्माणलाई सहज बनाउँछ । पाँच हजार मिलिअम्पियर क्षमताको ब्याट्रीले लामो समयसम्म प्रयोग गर्न सकिने सुविधा दिन्छ भने ए५७ मा छिटो चार्ज हुने सुविधा पनि उपलब्ध छ ।

ठूलो ताप नियन्त्रण प्रणालीका कारण उपकरणले लामो समयसम्म स्थिर प्रदर्शन दिन सक्ने कम्पनीको दाबी छ। दृश्य स्पष्ट बनाउन विशेष प्रदर्शन प्रविधि पनि प्रयोग गरिएको छ ।

दुवै उपकरण पानी र धुलोबाट सुरक्षित रहने स्तरका छन्। साथै, सामसङले ६ पुस्तासम्म सञ्चालन प्रणाली अद्यावधिक र ६ वर्षसम्म सुरक्षा अद्यावधिक प्रदान गर्ने जनाएको छ ।

मूल्यका हिसाबले ग्यालेक्सी ए५७ फाइभ जी (१२ जिबी-२५६ जिबी) को मूल्य ८९ हजार ९९९ रुपैयाँ तथा (८ जिबी-२५६ जिबी) को ८४ हजार ९९९ रुपैयाँ तोकिएको छ । त्यस्तै, ग्यालेक्सी ए३७ फाइभ जी (१२ जिबी-२५६ जिबी) को मूल्य ७९ हजार ९९९ रुपैयाँ, (८ जिबी-२५६ जिबी) को ७२ हजार ९९९ रुपैयाँ र (८ जिबी-१२८ जिबी) को ६४ हजार ९९९ रुपैयाँ निर्धारण गरिएको छ ।

प्रकाशित समय : ११:५० बजे