नेपालमै पहिलोपटक सार्वजनिक सुनुवाईमार्फत उपभोक्ताको गुनासो सुन्न सूचना प्रविधिको प्रयोग गर्न लागिएको छ । विद्युत नियमन आयोगले यही चैत्र १४, १६ र १७ गते आयोजना गर्न लागेको सार्वजनिक सुनुवाईमा यस्तो प्रविधिको प्रयोग हुन लागेको हो ।

आयोगले बुधबार पत्रकार सम्मेलनको आयोजना गरी कार्यक्रम बिहान १० देखि बेलुकी ५ बजेसम्म मध्य बानेश्वरस्थित डाइनिङ पार्कमा सञ्चालन हुने जानकारी गराएको छ । आयोगका अध्यक्ष डिल्लीबहादुर सिंहका अनुसार कार्यक्रममा आयोगका पदाधिकारी तथा सदस्यहरु र नेपाल विद्युत प्राधिकरणका प्रतिनिधिहरु उपस्थित हुनेछन् । अत्याधुनिक सूचना प्रविधि ‘इ-हेअरिङ’ प्रविधिको माध्यमबाट मेचीदेखि महाकालीसम्म र विदेशमा रहेका नेपालीहरुले समेत आफ्नो प्रतिक्रिया दिन पाउने व्यवस्था मिलाइएको अध्यक्ष सिंहले जानकारी दिए ।

प्रतिक्रिया, राय वा सुझाव दिन इच्छुक व्यक्तिले बिहान १० देखि ५ बजेसम्म सम्पर्क गर्नु पर्नेछ । यसका लागि जोकोहीले मोबाइल नम्बर ९८४७३४००३८, ९८४७३४००४३ र ९८४७३४००४५ मा सम्पर्क गर्न सक्ने अध्यक्ष सिंहले जानकारी दिए । यसबाहेक यसै नम्बरको ह्वाट्स एप वा भाइबरबाट पनि सम्पर्क गरी आयोगको इमेल ठेगानामा प्रतिक्रिया दिन सकिने विज्ञप्तिमा उल्लेख छ ।

कोरोना भाइरसको कारण भीडभाड हुने किसिमका ठूलो भेला नगर्न सरकारले गरेको सूचनालाई ध्यान दिँदै प्रविधिमार्फत उपभोक्ताको प्रतिक्रिया लिन लागिएको आयोगले जनाएको छ । प्राप्त प्रतिक्रियाहरुको आधारमा महसुल निर्धारण गरिने अध्यक्ष सिंहले बताए ।

‘विद्युत नियमन आयोग सार्वजनिक सुनुवाई सञ्चालन निर्देशिका २०७६’ बमोजिम कार्यक्रम सञ्चालन गरिने र सहभागीहरुले सो निर्देशिकाको अनुसुची (१) बमोजिमको आचारसंहिता पालन गर्नुपर्ने अध्यक्ष सिंहले बताए । ‘सहभागीले सभ्य, सरल, मर्यादित भाषाको प्रयोग गर्नुपर्ने, सुझाव, प्रश्न के राख्ने पहिले स्पष्ट हुनुपर्ने लगायतका आचारसंहिता छन् । त्यो सबैले पालना गर्नुपर्छ,’ उनले भने ।

प्राधिकरणले विद्युत नियमन आयोगसमक्ष पेश गरेको विद्युत महसुल निर्धारण प्रस्तावउपर सार्वजनिक सुनुवाई आव्हान गरिएको अध्यक्ष सिंहले बताए ।

प्रकाशित समय : २३:५८ बजे