गोल्डेन ड्रागन च्याम्पियनसिपको १५औँ संस्करणमा सहभागी हुन भूपेन्द्र गुरुङ अमेरिकाको क्यालिफोर्निया प्रस्थान गर्ने भएका छन् ।

क्यालिफोर्नियास्थित आर्काडिया हाइ स्कुल जिम्नाजियममा हुने प्रतियोगितामा भूपेन्द्रले दुई स्पर्धामा नेपालको चुनौती प्रस्तुत गर्नेछन् । भूपेन्द्रले ३६ वर्षमाथि उमेर समूहमा ताइची र ट्रेडिसनल चाइनिज फम्समा आफ्नो कौशल प्रस्तुत गर्नेछन् ।

ट्रेडिसनल चाइनिज मार्सल आर्टस् फेडरेसन, युएसएको आयोजनामा हुने प्रतियोगितामा विभिन्न ३० राष्ट्रका दुई सय ५० भन्दाबढी खेलाडीको सहभागिता रहने बताइएको छ ।

विभिन्न तीन अन्तर्राष्ट्रिय प्रतियोगितामा भूपेन्द्रले यसअघि तीन स्वर्णपदक जितिसकेका छन् । उनले सन् २०१८ मा जर्मनीमा भएको विश्व च्याम्पियनसिप, सन् २०१९ मा थाइल्याण्डमा भएको सातौँ विश्व कुङ्फु च्याम्पियनसिप र सन् २०२२ मा बेलायतमा भएको युरोपियन च्याम्पियनसिपमा स्वर्ण जितेका थिए । उनले सन् २०२२ मा भारतको लखनउमा भएको १४औँ राष्ट्रिय कुङ्फु च्याम्पियनसिपमा निर्णायकको भूमिका पनि निर्वाह गरिसकेका छन् ।

भूपेन्द्रलाई सफलताको शुभकामना दिँदै नेपाल उमा कुङ्फु सङ्घका वरिष्ठ उपाध्यक्ष सञ्जितकुमार राई र आदिवासी खेलकुद सङ्घ नेपालका प्रशिक्षक इजिकेल परियारले आज यहाँ आयोजित एक कार्यक्रमबीच बिदाइ गर्नुभयो । भूपेन्द्र बुधबार अमेरिका प्रस्थान गर्नेछन् ।