आफ्नाविरुद्ध पक्राउ पुर्जी जारी भएर प्रहरी पक्राउ नै गर्न पुगेपछि राष्ट्रिय स्वतन्त्र पार्टीका सभापतिसमेत रहेका पूर्वगृहमन्त्री रवि लामिछानेले भने– सरकार मर्‍यो, हामीलाई जुठो पर्‍यो । प्रधानमन्त्री केपी शर्मा ओलीमाथि आक्रोश आकोल्दै रविले भने– ‘तपाईँको हातमा तस्करले दिएको करोडको घडी, मेरा हातमा चाहीँ हतकडी ? तपाई विचौलियाको सेवा गरे बापत लाखौंको चस्मा र जुत्ता लगाउने, मुद्दा मैले खेपि दिनुपर्ने ? तपाई प्रमाणित भ्रष्टाचारीबाट करोडौंको जग्गा खुल्लम खुल्ला लिने, मैले ठगीको आरोप खेपी दिनुपर्ने । तिमीहरु राज्यका भए भरको शक्ति लगाएर अनुसन्धान गर्दापनि केही भेट्दैनौ अनि तिम्रो एउटा नेताको राजनीति जोगाउन र तिम्रो दुई तिहाइको सरकार जोगाइदिन म बली चड्नु पर्ने ? तिमी र तिम्रा नेता मिलेर सहकारीबाट ८७ अर्ब अपचलन गर्ने, म सहकारी ठग भैदिनु पर्ने ?

यति गरेपछी भाटभटिनीको इस्यु मोड्न पनि पाइयो । प्रमाण छ भन्ने युवा नेतालाई पनि भागेर हिड्न परेन । तर म कहिले भागेर हिडिन र हिड्दिन पनि । ओली जी, भ्रष्टाचारी समाउन मैले प्रधानमन्त्रीको अफर लत्याए, तिनै भ्रष्टाचारी जोगाउन तपाईले त्यही अफर रातारात विचौलियालाई साक्षी राखेर लिनुभो ।’ रविले पक्राउ पर्नुअघि सरकारमाथि आक्रोश ओकाल्दै सामाजिक सञ्जालमा पोस्ट्याएका छन् ।

शुक्रबार आफ्नो हातमा हतकडी लाग्दै छ भन्ने विषयमा रवि लगभग जानकार थिए । माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले रविलाई सरकारले पक्राउ गर्न खोजेको सुराक दिउँसो बसेको विपक्षी दलको बैठकमै चुहाएपछि हडबडाएका रवि बैठक सकेर सिधैं पार्टी कार्यालय वनस्थली पुगे । रवि पार्टी कार्यालय पुगेपछि नेता कार्यकर्तालाई उपस्थित हुन तल्लो तहका नेताहरुले उर्दि जारी गरे । लगतै घण्टी घर कार्यकर्ताले भरियो ।

उनीहरुले यसलाई राजनीतिक प्रतिशोधको संज्ञा दिए । रविले सुईको पाएर नेता कार्यकर्ता जम्मा गर्दैगर्दा उनीविरुद्ध पक्राउ पूर्जी ल्याउन कास्की प्रहरी जिल्ला अदालत पुगिसकेको थियो । संयोग पनि कस्तो भने दसैं विदामा रहेका जिल्ला अदालत कास्कीका ७ मध्ये ६ न्यायाधीश विदामै थिए । तर सरकारको ताकेता पछि नेपालगञ्जमा रहेका न्यायाधीश कृष्णजङ्ग शाह विमानमार्फत पोखरा उत्रिएर कार्यालयमा पुगेपछि रविविरुद्ध अपरान्ह पक्राउ पूर्जी जारी भयो । जिल्ला अदालत कास्कीले रविसहित १४ जनाविरुद्ध पक्राउ पूर्जी जारी गरेको छ ।

राजनीतिका चतुर खेलाडी ओलीले आफ्नै सरकारको पालामा रविलाई उठाईदिएका छन् । स्मरण रहोस्, कुनैबेला ओली नै हुन्, जसले बुई बोकेर रविलाई गृहमन्त्री बनाएका थिए ।

रवि पक्राउ पर्दैछन् भन्ने कुरामा रास्वपा लगभग यसअघि नै कन्भिन्स थियो । फलतः उसले विपक्षी मोर्चासँग मिलेर प्रतिकारको नीति पनि बनायो । रास्वपासहित माओवादी र एकिकृत समाजवादीका नेताहरुले पनि राजनीतिक आग्रह पूर्वाग्रह राखेर पक्राउ गरे प्रतिवाद गर्नेसम्मको चेतावनी दिए । तर विपक्षीको प्रतिवादका बीच सरकारले रविलाई पक्राउ गरेको छ ।

यसअघि पनि रविलाई पक्राउ गर्ने तयारी नभएको होइन । कांग्रेस–एमालेको मुख्य चासो नै यतिबेला रविको पक्राउ बनेको छ । सहकारी छानबिन समितिले रविलाई कारबाही सिफारिस गर्न बित्तिकै उनीहरु पक्राउ गर्न चाहन्थे । तर सरकार पक्राउभन्दा बढी ट्रयाल गर्न व्यस्त बन्यो । रविसँगै कारबाही सिफारिस परेका छबिलाल जोशीलाई सरकारले असोज ६ मा पक्राउ गरेको थियो । जतिबेलै रविलाई पनि पक्राउ गर्ने भन्दै प्रहरीलाई पार्टी कार्यालयमै रेकी गर्न पठाएपछि रविले कार्यकर्ता नै बोलाएर सम्बोधन गरेका थिए । अदालतबाट पक्राउ पुर्जी जारी भएपछि भने गलेका रविले कार्यकर्तालाई सम्बोधन गरेरै अनुसन्धानमा सघाउने बन्दै गिरफ्तारी दिएका छन् । योसँगै उनी जीवनकालमा दोस्रोपटक जेल बस्न बाध्य बनेका छन् । जाँदाजाँदै रविले आफ्नाविरुद्ध जारी भएको पक्राउ पुर्जी बुझ्दै बाँचेर फर्किए सब भ्रष्टाचारीलाई जेल कोच्ने दाबी गरे । श्रीमती निकितालाई म ठग होइन भन्दै अंकमाल गर्दा भक्कानिए । जतिबेला रास्वपाका नेताहरु भावुक बनेर कतिका आँखामा आँशु टिलपिल भएको थियो ।

छबिलाल जोशीको पक्राउ लगत्तै उही मुद्दामा जीबी राईकी प्रेमिका भनिएकी लिला पछाईँलाई समात्दा पनि सरकारले रविलाई आतंकित पार्ने काम मात्र गरेको थियो । त्यसपछि दसैंकै मौकामा पक्राउ गर्ने चर्चा चल्यो । त्यसपछि पनि दसैं सकिएलगत्तै पक्राउ गर्ने सूचना बाहिर आयो । तर हल्ला चलाएर आतंकित पार्ने काम गर्दै आएको सरकारले शुक्रबार हल्लैहल्लाको बीचबाट पक्राउ पूर्जी थमाएर रविलाई उठाएको छ।

यीनीहरुलाई छुट दिनुको परिणाम रविलाई अहिले बल्ल महसुस भएको छ । आफु सहकारीमा पक्राउ पर्नुभन्दा पहिला स्वर्णिम अवसरमा थियो । गिरीबन्धुमा ओली, नक्कली शरणार्थीमा आरजु, बालुवाटार, वाईडबडी, टेरामक्स र टिकापुरमा एकएकलाई किन्तु परन्तु नभनि जेल हालिदिएको भए आज यो अवस्था भोग्नुपर्ने थिएन । हिजो उनले जसलाई जोगाउन खोजे, आज उनैले फसाए । हिजो रविले छुट दिए, तर आज आफुले छुट पाएनन् । हिजो उनीलाई भित्र कोच्ने आट देखाएनन्, आज उनैले आट देखाएर कोचिदिए । त्यसैले समय बलवान् छ । समयले पर्खिदैन र समयमै गर्नुपर्ने तमाम गर्नुपर्छ यसै भनिएको कहाँ होर । अन्ततः पार्टी कार्यालयभित्रै घुसेर प्रहरीले चिलले चल्लो टिपेजसरी टपक्क उठाएर लियो ।

बालुवाटार र सिंहदरबारभित्र खानेहरुकै भेला छ । दुई ठूला दल मिलेर अहिले झन हाइसुक्कसँग खाने बाटो खोज्दैछन् । अर्बौ खाएर यीनीहरुको चिन्ता भने गोर्खा मिडियामा रवि लामिछानेले खाएको केही करोडमा परेको छ । अर्थात् क्वन्टली सुनचोरले फुली चोरलाई चोर भन्दैछ । ८८ अर्ब ठग्ने असली ठगका बारेमा चिन्ता छैन । ६५ करोडको मामिलामा रविलाई पक्राउ नगरि एमाले–काँग्रेसलाई भएकै छैन । फलतः अनेक जालझेल र उतारचढावपछि रवि लामिछानेविरुद्ध आजमात्रै पक्राउ पुर्जी जारी भएर उनी पक्राउ परेका छन् । उनलाई गोर्खा मिडियामा आएको रकम परिचालनका विषयमा होइन, सूर्यदर्शन सहकारीको रकम ठगी गरेको आरोपमा छानबिन गर्न अदालतले प्रहरीलाई पक्राउ अनुमति दिएपछि आज नै उनी पक्राउ परेका हुन् ।

सूर्य थापा नेतृत्वको संसदीय छानबिन समितिले सूर्यदर्शनसहितका सहकारीबाट गोर्खा मिडियामा आएको ६५ करोड अपचलनमा रविलाई पनि कारबाही सिफारिस गरेको थियो । गोरखा मिडियामा आएर खर्च भएको पैसाको जिम्मेवारी लिनुपरे आफु तयार रहेको सन्देश रविले यसअघि नै दिएका थिए । तर सरकारले उनीविरुद्ध ठगी र संगठित अपराधको मुद्दासमेत लगाउने तयार गरेको छ । जसका विरुद्ध रास्वपा प्रतिवादमा उत्रिएको छ । जसलाई अहिले सत्ताविहिन विपक्षी दलहरुले समेत साथ दिइरहेका छन् । मुलतः रविको पक्राउ र विपक्षी सशंकित भएको विषय पनि यही हो । तथापी सरकारले अहिलेसम्म कारबाही प्रक्रियाभन्दा पनि यसलाई जिस्क्याउने र तर्साउने हतियारका रुपमामात्रै नाटक मञ्चन गरिरहेको छ । किनकि कारबाही गर्नुपर्ने असली ठगहरुलाई पनि हुनुपर्ने हो । ६५ करोडका पछाडी सारा शक्ति खन्याएर ८८ अर्ब लुट्ने असली सहकारी ठगहरुको पक्षपोषक सरकार नै हो । अहिलेको यो कदम कारबाहीभन्दा बढी पाखण्डीपन पनि हो ।

विगतमा सत्ता र शक्तिमा भएकै बेला बालकृष्ण खाड र टोपबहादुर रायमाझी पक्राउ परेका थिए । उनीहरु पक्राउ पर्दा पनि आकाशै खसेको थिएन । अब रवि पक्राउ परेर पनि आकाशै खस्दैन । कानुनले आफ्नो काम गर्छ । प्रमाणबिनै थुन्न र धेरै दिन हुल्न मिल्दैन । प्रमाण भएकै कारण टोपबहादुर रायमाझीहरु अझै जेलमै छन् । आफैले बनाएको छानबिन समितिले गरेको कारबाही सिफारिसकै आधारमा प्रहरीले पक्राउ पर्दा धेरै दलहरुले समेत कानुनलाई सघाउनुको विकल्प छैन । हाम्रो भनाइ, यत्ति हो कि, निर्दाेष पर्नु हुँदैन, दोषी उम्किनु हुँदैन । हिजो आफु सत्तामै भएका बेला नाम चलेका भ्रष्टहरुलाई यसैगरि थुनिदिएको भए, आज यो अवस्था नआउन पनि सक्थ्यो । तर त्यतिबेला गरिएन अहिले आफैले भोग्नुपर्‍याे ।

प्रकाशित समय : १३:०२ बजे