नेपाल विद्युत प्राधिकरण महसुल नतिर्ने ग्राहकप्रति आक्रामक रुपमा प्रस्तुत भएको छ। प्राधिकरणले पछिल्लो २० दिनमा २१ हजार ग्राहकको लाइन काटेको छ।

भदौ ११ गतेदेखि ३१ गतेसम्म २१ हजार ३ ग्राहकको लाइन काटेको प्राधिकरणले जनाएको छ।

प्राधिकरणका अनुसार लाइन काटिएका ग्राहकबाट ४० करोड ४२ लाख १७ हजार २८ रुपैयाँ महसुल उठाउन बाँकी रहेकामा १५ हजार २२३ ग्राहकबाट २४ करोड ६ लाख ८५ हजार ४८८ रुपैयाँ उठाइएको छ। प्राधिकरणले महसुल तिर्ने ग्राहकको लाइन जोडिदिएको छ।

महसुल बुझाउन बाँकी ५ हजार ७८० ग्राहकको लाइन नजोडेको प्राधिकरणका एक कर्मचारीले बताए।

कुन कार्यालय मातहत कति लाइन काटियो ?

प्राधिकरणको मधेस प्रादेशिक कार्यालयले सबैभन्दा धेरै ग्राहकको लाइन काटेको छ। यो कार्यालयले ४ हजार ६३४ ग्राहकको लाइन काटेको हो। ती ग्राहकबाट ६ करोड ५२ लाख ८ हजार ८७९ रुपैयाँ महसुल उठाउन बाँकी थियो‍।

यस्तै कोशी प्रादेशिक कार्यालय विराटनगरले ४ हजार ५६, बागमती प्रादेशिक कार्यालय काठमाडौंले ९३७, बागमती प्रदेश डिभिजन कार्यालय हेटौंडाले १ हजार ४२६, गण्डकी प्रादेशिक कार्यालय पोखराले २ हजार ३७५, लुम्बिनी प्रदेश डिभिजन कार्यालय बुटवलले २ हजार ९७२ र नेपालगञ्जले २ हजार ४०६, कर्णाली प्रादेशिक कार्यालयले सुर्खेतले १ हजार ७९९ र सुदूरपश्चिम कार्यालय अत्तरियाले ३९८ ग्राहकको लाइन काटेका छन्।

प्रकाशित समय : ०७:३३ बजे