कोशी प्रदेशमा नेकपा माओवादी केन्द्रले समर्थन फिर्ता लिएर सरकार छाडेपछि मुख्यमन्त्री हिक्मत कार्की नेतृत्वको सरकार अल्पमत परेको छ ।

माओवादीका १२ सांसदले समर्थन फिर्ता लिएसँगै कार्की नेतृत्वको सरकारले बजेट ल्याउन नपाउन अवस्था सिर्जना भएको छ ।

९३ सदस्यीय प्रदेशसभामा एमाले, माओवादी, राप्रपा र जसपाका गरी ५९ सांसदको समर्थनमा कार्की गत पुस २४ गते मुख्यमन्त्रीमा नियुक्त भएका थिए ।

प्रदेश सरकारको भौतिक पूर्वाधार विकास मन्त्रीमा दुर्गाप्रसाद चापागाईं र वन, पर्यटन तथा वातावरण मन्त्रालयमा जीवन आचार्य मन्त्री छन् । दुवै मन्त्री आजै मुख्यमन्त्रीलाई राजीना बुझाउने माओवादीले जनाएको छ । उनीहरु गत माघ ६ गते मन्त्रीमा नियुक्त भएका थिए ।

प्रदेशसभामा बहुमतको लागि ४७ सांसद आवश्यक पर्छ । माओवादीले समर्थन फिर्ता दिएपछि ४० र राप्रपाका ६ गरी सरकारको समर्थनमा ४६ सांसद मात्र छन् ।

तीनै दल मुख्यमन्त्री ताक्दै

माओवादीले अर्को सरकार गठनका लागि मुख्यमन्त्रीमा आफ्नै दलका नेता इन्द्रबहादुर आङ्बोलाई अगाडि सार्ने निर्णय पनि गरेको छ । भने, एमाले राप्रपा र जसपालाई फकाएर अथवा राम्रो मन्त्रालय लिएर सरकार टिकाउन मुख्यमन्त्री कार्की छलफलमा जुटेका छन् ।

यस्तै, माओवादीले साथ दिएमात्रै कांग्रेसले सरकार बनाउन सक्ने अवस्था छ । माओवादीसहित अन्य साना पार्टीको सहयोगमा कांग्रेसले सरकार बनाउन सकिने बताउँदै आएको छ ।

माओवादी भने, पहिला आफूले सरकारको नेतृत्व गर्न पाउनुपर्ने तर्कसहित मुख्यमन्त्रीका दाबी गर्न थालेको छ । माओवादीले भने अहिले एमाले र कांग्रेससँग समानान्तर रूपमा बार्गेनिङ गरेर मुख्यमन्त्री लिन खोजेको आजको निर्णयबाट थाहा हुन्छ ।

माओवादीले पहिला एमालेलाई समर्थन गर्दा पनि मुख्यमन्त्रीमा दाबी गरेको थियो । यतिबेला केन्द्रीय गठबन्धन आलोपालोमा सहमति नभए सरकारमा सहभागी नहुने अडान राखेपनि सरकारमा सहभागि भएको थियो ।

कांग्रेसले मंगलबार बसेको बैठकले सरकार गठनको पहल गर्ने निर्णय गरेको प्रदेश सांसद हिमाल कार्कीले जानकारी दिए । एमालेको सरकार अल्पमतमा परेपछि कोशी प्रदेश सरकारको नेतृत्व कांग्रेस लिन उनको भनाइ छ ।

यस्तै, अहिलेको अवस्थामा माओवादीले पनि सरकारको नेतृत्व गर्न सक्ने र मुख्यमन्त्रीसहित सरकारमा जाने निर्णय पार्टी गरेको आङ्बो जानकारी दिए । सबै पार्टीको समर्थन लिएर सरकार बनाउने पक्षमा माओवादी रहेको उनको भनाइ छ ।

कुन् पार्टीलाई सरकार बनाउन सहज छैन

माओवादीले समर्थन फिर्ता लिएसँग वर्तमान सरकार अल्पमतमा परेको छ । उता, एमाले र राप्रपा बाहेकका पार्टीहरु मिलेर सरकार बनाउन सक्ने सम्भावना पनि कम नै छ ।

भने, कांग्रेस, माओवादी, नेकपा एस र जसपाको गरी ४७ सांसद पुगेपनि सभामुखले विश्वासको मत दिन नपाउने कानुनी व्यवस्था छ । जसका कारण अहिलेको अवस्थामा सबै पार्टी सरकार बनाउन सहज छैन ।

सभामुखले मत दिएमा बहुमत जुटाउन सक्ने आशामा रहेको कांग्रेस–माओवादीसहित सत्ता गठबन्धनका दलहरु विश्वासको मत लिने र विधेयक पास गर्ने प्रयोजनमा बारम्बार विवाद हुँदै आएको छ ।
जनता समाजवादी पार्टी (जसपा) र माओवादी केन्द्रले समर्थन फिर्ता लिएसँगै एमाले नेतृत्वको सरकार अल्पमतमा परेको छ ।

जसपाले एमालेलाई दिएको समर्थन अहिलेसम्म फिर्ता नलिएकाले अझै पनि कार्की नेतृत्वको सरकारमा ४७ सांसदको समर्थन भने देखिन्छ ।

कांग्रेसका २९, माओवादीको १३, नेकपा (एकीकृत समाजवादी) को ४ र जसपाको १ गरी ४७ सांसद प्रतिपक्षमा आउने भएका छन् । अल्पमतमा परेपछि हिक्मत कार्कीले एक महिनाभित्र विश्वासको मत लिनुपर्नेछ ।

प्रदेश सरकार बजेटको तयारीमा रहेका छ । एमालेका मुख्यमन्त्री हिक्मत कार्की बजेटको तयारीमा लागेका बेलामा सरकार गठबन्धन हेरफेर अवस्थामाल पुगेको हो ।

माओवादीबाट सरकारमा सहभागि मन्त्रीहरुपनि बजेटपछि मात्र सरकार छाड्ने पक्षमा थिए । तर, पार्टी सरकार छाड्ने निर्णय गरेपछि आजै उनीहरुले राजीनामा दिदैँछन् ।

प्रकाशित समय : १४:२५ बजे