नेपाल अलैँची व्यवसायी महासंघले नेपालमा उत्पादित अलैँचीको बजारीकरणका लागि ‘वाह अलैँची’ नामक कार्यक्रम सुरुवात गरेको छ । अलैँचीको प्रवर्द्धन गर्ने उद्देश्यले स्वीस सरकारको सहज कार्यक्रमअन्तर्गत ‘वाह अलैँची’ कार्यक्रम सुरुवात गरिएको हो ।

स्वीस कार्यक्रममार्फत नै मास्टर सेफ सन्तोष शाहलाई अलैँचीको ब्राण्ड एम्बास्डर नियुक्त गर्दै कार्यक्रमको सुरुवात गरिएको हो । प्रदेश नं १ सरकारको सहयोगमा सञ्चालित कार्यक्रमको उद्घाटन कार्यक्रममा प्रदेश १ का कृषि मन्त्री झलकसिंह दर्लामीले नेपालमा उत्पादित अलैँची विश्व बजारमा प्रख्यात रहे पनि नेपालमा यसको प्रयोग ज्यादै न्यून रहेकाले नेपाली उपभोक्ता माझ पनि अलैँचीका विषयमा जानकारी दिनुपर्ने बताए । उनले अलैँची उत्पादन गर्ने कृषक र व्यवसायीका लागि प्रदेश सरकारले सहयोग पुर्याउने बताए।

नेपालमा वार्षिक सात अर्बको अलैँची उत्पादन हुँदै आएको छ । नेपालका ४५ जिल्लाको झण्डै १८ हजार ४ सय हेक्टर क्षेत्रफलमा व्यावसायिकरूपमा अलैँची खेती हुँदै आएको र वार्षिक करिब पाँच हजार पाँच सय मेट्रिकटन अलैँची उत्पादन हुने गरेको नेपाल अलैँची व्यवसायी महासंघका केन्द्रीय अध्यक्ष निर्मल भट्टराईले जानकारी दिए ।

प्रकाशित समय : २०:४३ बजे