कोरोनाभाइरस (कोभिड- १९)को निःशुल्क पीसीआर परीक्षणका लागि काठमाडौं महानगरपालिकाले आजदेखि स्वाब संकलन सुरु गरेको छ । महानगरभित्र रहेका अशक्त र जेष्ठ नागरिकहरुको भने मोबाइल भ्यानमार्फत स्वाब संकलन गरिने महानगरपालिकाका मेयर विद्यासुन्दर शाक्यले बताए ।

उनका अनुसार सरकारले घोषणा गरेअनुसार लक्षित समूहको निःशुल्क परीक्षण गर्न लागिएको हो । परीक्षण आफैँ गर्न सक्ने क्षमता भएकाहरुलाई शुल्क तिरेरै परीक्षण गर्न उनले आग्रह गरे । कन्ट्याक ट्रेसिङमा परेका र लक्षण देखिएकालाई मात्र पीसीआर टेष्ट गर्न लागिएको मेयर शाक्यले जानकारी दिए ।

‘सरकारले कोरोना नियन्त्रणका लागि आफ्नो तर्फबाट कडा मेहनत गरिरहेकै छ । यसमा समुदायस्तरबाट सहयोग नभए नियन्त्रणमा नआउन सक्छ,’ उनले भने, ‘त्यसैले स्थानीय स्तरबाट नै कोरोना महामारीविरुद्ध लड्न सहयोग गर्न काठमाडौं महानगरपालिकाले पनि परीक्षणको दायरा फराकिलो बनाउन लागेको हो ।’

प्रकाशित समय : १९:२४ बजे