fbpx
Dashain shuvakamana-long ad
corona information

गृहपृष्ठ पत्रकारको रिले अनसन सुरु, श्रमजीवी पत्रकार ऐन कार्यान्वयनको माग

पत्रकारको रिले अनसन सुरु, श्रमजीवी पत्रकार ऐन कार्यान्वयनको माग

कोरोनाको बाहनामा जबर्जस्ती मिडिया हाउसबाट निकालिएका, तलब नदिइएका र तलब माग्दा दुर्गम क्षेत्रमा सरुवा गर्नुका साथै महिनौँदेखि तलब नदिने सञ्चार संस्थाबाट पीडित पत्रकार तथा कर्मचारीले रिले अनसन सुरु गरेका छन् । लामो समयसम्म पनि तलब माग्दा, पुनर्बहाली गर्दा तथा श्रमजीवी पत्रकार ऐनअनुसार सुविधा माग्दा कामबाटै वञ्चित गराइएपछि पत्रकारहरु रिले अनसनमा बसेका हुन् ।

पत्रकार महासंघको समन्वयमा बिहीबार पीडित पत्रकार/कर्मचारी संयुक्त संघर्ष समितिले पहिलो चरणको आन्दोलन स्वरुप रिले अनसन सुरु गरेको जनाएको छ । पाँच दिने अनसनमा पत्रकार विभिन्न संघसंगठनले ऐक्यबद्धता जनाएका छन् । कारोबार दैनिकमा कार्यरत पत्रकार धर्मेन्द्र कर्णको संयोजकत्वमा गठित समितिले श्रमजीवी पत्रकार ऐन लागू नगरेसम्म अनसन जारी रहने बताएको छ ।

‘वर्षौंदेखि अरुका अन्यायविरुद्ध हामीले समाचार लेख्यौं, त्यही विषयलाई व्यापार बनाएर मिडिया मालिकले कमाए,’ उनले भने, ‘अहिले ऐनअनुसार सुविधा माग्दा कामबाटै निकाल्ने, अनेक हत्कण्डा मच्चाउने काम किन भइरहेको छ ? के यी कर्पोरेट मिडियाहरू राज्यभन्दा पनि ठूला हुन् ?’

उनले श्रमजीवी पत्रकार ऐन २०५१ पूर्ण रुपमा कार्यान्वयनका लागि देशभरका सबै पीडित पत्रकारलाई अनुरोध पनि गरेका छन् । हाल अनसनमा नागरिक, अन्नपूर्ण, कान्तिपुर टेलिभिजन, कारोबार दैनिक र नेपाल आजका पीडित पत्रकार कर्मचारीको सहभागिता छ । पाँच दिने रिले अनसनका क्रममा पनि मिडिया मालिकहरुले सहमति नगरे सशक्त आन्दोलनमा जाने कर्णले बताए ।

अनसन सुरुवात कार्यक्रममा पत्रकार महासंघका सचिव रामप्रसाद दाहालले पत्रकार महासंघकै समन्वयमा भएको आन्दोलनले पूर्णता नपाउँदासम्म नरोकिने बताए । ‘हामीले सकभर सहमतिमै समस्या समाधान गर्नुपर्छ भन्ने बुझेर पटक–पटक मिडिया हाउससँग वार्ता गरेका छौं,’ उनले भने, ‘तर उहाँहरु समस्या समाधान गर्न इच्छुक देखिनुभएन । अब हाम्रा साथीहरुले सुरु गरेको आन्दोलन निचोडमा नपुग्दासम्म रोकिँदैन ।’

उनले न्यायका लागि लेख्नेहरु नै अन्यायमा पर्नु दुर्भाग्यपूर्ण रहेको भन्दै अब पत्रकारहरुले आफ्नो हकहित र सरकारले प्रदान गरेको ऐनअनुसारको सेवा सुविधा लिएरमात्रै आन्दोलन रोकिने बताए । कानुनी बाटोमा जानका लागि पनि महासंघले सहजीकरण गरिहेकाले आन्दोलन र कानुनी दुवै बाटोबाट पत्रकारका हकहित स्थापनाका लागि अघि बढ्ने उनको भनाइ छ ।

पत्रकार महासंघका केन्द्रीय सदस्य जन्मदेव जैशीले अपारदर्शी ढंगले कारोबार गर्ने मिडियाहरुले अब व्यवसायको हिसाबकिताब पनि सार्वजनिक गर्नुपर्ने बताए । ‘कोरोनाको वहानामा पुरानो इख राख्दै अहिले साथीहरुलाई निष्कासन गर्ने, तलब नदिने, महिनौंदेखि अनेक किसिमका स्पष्टीकरण सोधेर मानसिक तनाव दिने काम भइरहेको छ,’ उनले भने, ‘महासंघकै नेतृत्वमा अब आन्दोलन अघि बढ्छ । पत्रकारहरुलाई राज्यले प्रदान गरेको अधिकार जसरी पनि लिनुपर्छ ।’

मिडिया नेपाल, प्रेस संगठन, मधेसी पत्रकार समाजलगायतका पत्रकार संघसंगठनहरुले आन्दोलनप्रति ऐक्यबद्धता जनाएका छन् । पीडित पत्रकारले पनि अब कानुनी र सडक संघर्षबाटै अधिकार प्राप्त गर्ने बताएका छन् । पीडित पत्रकारहरुका तर्फबाट अन्नपूर्ण पोस्टका वरिष्ठ उप–सम्पादक डिल्ली आचार्यले महामारीको समयमा हटाउने नियत राखेरै मिडिया हाउसले दुर्गममा सरुवा गर्ने र पारिश्रमिक नदिएर मानसिक तनाव दिने काम गरेको बताए । ‘हामीलाई अनावश्यक सरुवा गर्ने, तलब रोक्ने तथा स्पष्टीकरण सोधेर तनाव दिने काम भइरहेको छ । पारिश्रमिक पाएपछि कुन पत्रकारले काम गर्दैन र !’ उनले भने, ‘तर हटाउने मनसायले अनेक हत्कण्डा मच्चाउने काम मिडिया हाउसहरुबाट भइरहेको छ, त्यसको मतियार स्वयं सम्पादकहरु नै भइरहेका छन् ।’

प्रकाशित समय १९:१२ बजे

vayodha-hospital

प्रतिक्रिया दिनुहोस्

सम्बन्धित शीर्षकहरु