fbpx
corona information

गृहपृष्ठ नेताकै संरक्षणमा रहेका कार्यकर्ताद्वारा कुटिन्छन् पत्रकार, प्रहरी बन्छ मुकदर्शक

नेताकै संरक्षणमा रहेका कार्यकर्ताद्वारा कुटिन्छन् पत्रकार, प्रहरी बन्छ मुकदर्शक

सञ्चारकर्मीहरुको काम हो जनतालाई सुसूचित गर्ने, अन्याय अत्याचारका विरुद्ध आवाज उठाउने । नागरिकका आवाजहरुलाई सम्बन्धित पक्षसम्म पुर्‍याउने काम सञ्चारकर्मीले गरेको हुन्छ ।

सुदूरपश्चिमको अस्थायी राजधानी धनगढीमा भने २/३ महिनाको अन्तरालमा एकपटक पत्रकारहरुले सडकमा आउनैपर्ने अवस्था हुन्छ । पत्रकारहरुमाथि पटक-पटक आक्रमण हुने तर आक्रमणकारी हप्तौँसम्म पक्राउ नपर्ने परिपाटी कैलालीमा कायमै छ । राजनीतिक कार्यकर्ता पत्रकारमाथि आक्रमण गर्छन् । तिनै कार्यकर्ताको बचाउमा नेता दगुर्छन् । नेताकै लागि प्रहरीले आक्रमणकारीलाई पक्राउ पनि गर्दैनन् ।

२०७४ साल मंसिर २ गते बर्दगोरिया गाउँपालिका २ घर भएका पत्रकार लक्ष्मी जैशीमाथि आक्रमण भएको थियो । तत्कालीन समयमा जनता टेलिभिजनका कैलाली संवाददाता रहेका जैशीलाई राति १२ बजे उनकै घरमा आक्रमण गरिएको थियो । जैशीलाई कुटपिट गरी घाइते बनाउनेहरु अहिलेसम्म पनि पक्राउ परेका छैनन् । त्यसैगरी डेढ वर्षअघि एसटीएस टेलिभिजनका समाचार प्रमुख लोकेन्द्र बिष्टमाथि कार्यालयबाट घर जाने बेला सामूहिक आक्रमण भयो । उनलाई आक्रमण गर्नेहरुलाई पनि अहिलेसम्म प्रहरीले पक्राउ गर्न सकेको छैन ।

दिनेश सञ्चारगृहका सहसम्पादक रहेका जनक बिष्टमाथि पटक-पटक आक्रमण भइरहेको छ । समाचार संकलनकै क्रममा विष्ट धेरै पटक आक्रमणको शिकार भइसकेका छन् । केही आक्रमणकारी राजनीतिक पहुँचका आधारमा पक्राउ नै परेनन् त पक्राउ परेका पनि पहुँचकै आधारमा छुटे ।

केही महिना पहिले मात्र कान्तिपुर दैनिकका पत्रकार गणेश चौधरीमाथि कैलालीको टीकापुरमा कुटपिट भएको थियो । तर, पत्रकार र सञ्चार गृहमाथि आक्रमण हुँदासमेत सरोकारवाला निकाय गम्भीर नबन्दा सोही प्रकृतिका घटना दोहोरिँदै जान थालेका छन् ।

शुक्रबार दिउँसो करिब १२ बजेको समयमा दिनेश सञ्चार गृहमा प्रवेश गरी एउटा समूहले सांघातिक हमला गर्‍यो । सञ्चार गृहको समाचार कक्षमा काम गरिरहेको अवस्थामा सहसम्पादक जनक विष्टसहितका पत्रकार र व्यवस्थापक अमिता कुँवर, प्राविधिक कल्पना सिंहमाथि कुटपिट र दुर्व्यवहार गरिएको थियो ।

दुर्व्यवहार गर्ने सबै भिडियोमा देखिन्छन् तर, अहिलेसम्म उनीहरु कसैलाई प्रहरीले पक्राउ गर्न सकेको छैन । पत्रकार र सञ्चार गृहमाथि आक्रमण गर्नेलाई प्रहरीले पक्राउ नगर्दा कैलालीका पत्रकार सडकमा उत्रेका छन् । पत्रकार महासंघ कैलालीका अध्यक्ष जगत साउँदले पत्रकार र सञ्चार गृहमाथि आक्रमण गर्नेलाई कारबाही नहुँदासम्म चरणबद्ध आन्दोलन गर्ने चेतावनी दिएका छन् ।

प्रहरीलाई उद्धृत गर्दै प्रकाशित गरिएको समाचार हटाउन भन्दै दिनेश सञ्चार गृहमा पुगेको समूहले आक्रमण गरेको थियो । आक्रमणमा संलग्न व्यक्तिहरुलाई कारबाहीको दायरामा ल्याउनुपर्ने माग गरिए पनि हालसम्म प्रहरीले उनीहरुलाई पक्राउ गर्न सकेको छैन ।

पत्रकार महासंघ कैलालीले चरणबद्ध आन्दोलनका कार्यक्रम तय गरेको छ । पत्रकारमाथि आक्रमण गर्नेलाई कारबाहीको माग गर्दै पत्रकारहरु सडकमा उत्रेका हुन् । देशमा गणतन्त्र स्थापनामा समेत पत्रकारहरुको मुख्य भूमिका रहेको भन्दै पत्रकार महासंघका पूर्व केन्द्रीय सदस्य दिलबहादुर छत्यालले यस्तै गतिविधिले कलम बन्द होला भन्ने मुर्खता नगर्न चेतावनी दिए ।

पत्रकारहरु समाचार लेखेकै भरमा कुटिने र कुट्नेहरुको पहिचान भइसके पनि पक्राउ नपर्ने हुँदा आक्रमणले बढावा पाएको छ । झन् पत्रकारमाथि आक्रमण गर्नेहरुलाई राजनीतिक संरक्षण हुँदा यो अवस्था सिर्जना हुन थालेको हो ।

समाजको ऐना मानिएको पत्रकारलाई यसरी आक्रमण भइरहँदा समाजका मुद्दा पनि ओझेलमा पर्ने पत्रकारहरुको ठम्याई‌ं छ । यसरी पत्रकारमाथि हमला भइरहँदा जिल्लामा मात्रै नभएर यो घटनालाई अन्तर्राष्ट्रियकरण गर्ने पत्रकार महासंघका केन्द्रीय सदस्य मीन बमले बताए ।

सञ्चारकर्मीले गलत समाचार लेख्यो अथवा आफ्नो पक्षमा समाचार लेख्यो भन्दै पटक-पटक आक्रमण भइरहेको छ । समाचार नै गलत भए कानुनी उपचारको बाटो हुँदाहुँदै पनि यहाँ गुण्डागर्दी मौलाएको र यस्तो गुण्डागर्दी मौलाउनुमा राजनीतिक संरक्षण दिने नै मुख्य दोषी भएको महासंघले जनाएको छ ।

प्रकाशित समय १२:४७ बजे

vayodha-hospital

प्रतिक्रिया दिनुहोस्

सम्बन्धित शीर्षकहरु