fbpx
corona information

गृहपृष्ठ बाढीले कैलालीमा २५ सय घरपरिवार विस्थापित

बाढीले कैलालीमा २५ सय घरपरिवार विस्थापित

लगातारको वर्षासँगै आएको बाढीले कैलालीमा सयौँ घर डुवानमा परेका छन् । बाढीले घर डुवानमा परेपछि दुई हजार पाँच सय परिवार विस्थापित भएको जिल्ला प्रशासन कार्यालयले जनाएको छ ।

वर्षा नरोकिएकाले बिहीबार पनि थप घरहरु डुवानमा परेको कार्यालयका सूचना अधिकारी शिवराज जोशीले जानकारी दिए । निरन्तरको वर्षाले बाढीको सतह नघट्दा बुधबार विस्थापित भएका परिवार घर फर्कन सकेका छैनन् । हिजो बेलुका बाढीको सतह घटेपछि घर फर्केका कतिपय परिवार बाढी बढ्न थालेपछि बिहीबार पुनः घर छोडेर सुरक्षित ठाउँमा गएको जोशीले बताए ।

बाढीबाट सबैभन्दा बढी प्रभावित भएको भजनी नगरपालिकाका विस्थापित परिवार हुलाकी राजमार्गमा बसिरहेका छन् । भजनीका नगर प्रमुख शेरबहादुर चौधरीले वर्षा निरन्तर भइरहेकाले बाढीको सतह नघटेको बताए । ‘एक घरबाट अर्को घरमा जानसक्ने अवस्था छैन । कतिपय मान्छेहरु हिजोदेखि घरभित्रै छन्,’ उनले भने, ‘बाढीले हिजो धेरै ठाउँ जानै सकिएन, आज पनि सुरक्षाकर्मीको टोली उद्धारमा खटिएको छ ।’

उद्धार गरेर सुरक्षित ठाउँमा राखिएकालाई खानाको व्यवस्था गरिएको उनले बताए । मंगलबार रातिबाट सुरु भएको वर्षा बुधबार बेलुका रोकिएको थियो । हिजो रातिबाट पुनः निरन्तर वर्षा भएपछि डुवान बढेको हो । भजनी नगरपालिका, टीकापुर नगरपालिका, जोशीपुर गाउँपालिका र जानकी गाउँपालिका बाढीबाट बढी प्रभावित भएका छन् ।

बाढीको सतह कायमै रहेकाले हिजो विस्थापित भएका परिवार घर फर्कन नसकेका जिल्ला प्रहरी कार्यालयका प्रवक्ता प्रहरी नायब उपरीक्षक प्रतिक बिष्टले जानकारी दिए । ‘डुवान उस्तै छ । आज पनि उद्धार कार्य भइरहेको छ,’ बिष्टले भने, ‘हिजोबाट दर्जनौँ गाउँ डुवानमा परेका छन् ।’

विस्थापितको उद्धारमा नेपाल प्रहरी, सशस्त्र प्रहरी र नेपाली सेनाको टोली परिचालन गरिएको छ । नेपाली सेनाको १७० जना र नेपाल प्रहरीको १५० जनाको टोली खटेको जिल्ला प्रशासन कार्यालयले जनाएको छ । जिल्लाभर तीन सयभन्दा बढी सशस्त्र प्रहरी उद्धारमा सक्रिय भएको सशस्त्र प्रहरी बल ३४ नम्बर गण कैलालीका प्रमुख सशस्त्र प्रहरी उपरीक्षक कमल प्रसाल तिमल्सिनाले बताए ।

प्रकाशित समय १६:०९ बजे

vayodha-hospital

प्रतिक्रिया दिनुहोस्

सम्बन्धित शीर्षकहरु