fbpx
Nepal Mediciti

गृहपृष्ठ ऐतिहासिक मन्दिरको पुनर्निर्माण अन्तिम चरणमा

ऐतिहासिक मन्दिरको पुनर्निर्माण अन्तिम चरणमा

तनहुँको म्याग्दे गाउँपालिका-३ किल्चोकस्थित निकै पुरानो ऐतिहासिक एवं धार्मिकस्थल अकलादेवी मन्दिरको पुनर्निर्माण अन्तिम चरणमा पुगेको छ । समितिको आन्तरिक कोषको रकमबाट गत जेठ १८ गतेदेखि सुरु भएको पुनर्निर्माणको काम अन्तिम चरणमा पुगेको हो ।

आगामी महिनाको फुलपातीको दिन उद्घाटन गर्ने गरी मन्दिरको काम तीव्र रुपमा भइरहेको मन्दिर निर्माण समितिका संयोजक रामभक्त घिमिरेले जानकारी दिए । घिमिरेका अनुसार छ तलाको मन्दिरमध्ये चार तलाको ढलानको काम सम्पन्न भएको छ । ‘अहिलेसम्म भइरहेको कामको गति हेर्दा दसैंको फुलपातीसम्म मन्दिर पुनर्निर्माण सम्पन्न हुने अनुमान गरेका छौँ,’ घिमिरेले भने ।

घिमिरेका अनुसार अकलादेवी मन्दिरको स्वरूप ललितपुरस्थित सन्तानेश्वर मन्दिरको जस्तै आकारमा निर्माण गरिएको छ । पुनर्निर्माण सुरु गर्दा ६३ लाख रूपैयाँ लागत अनुमान गरिए पनि मन्दिरको आकार थोरै परिवर्तन भएकाले लागत बढ्ने घिमिरेले जानकारी दिए । घिमिरेका अनुसार मन्दिर पुनर्निर्माणका लागि म्याग्दे गाउँपालिकाले ४० लाख रूपैयाँ सहयोग गर्ने वचन दिएको छ ।

पुनर्निर्माण सम्पन्न भएलगत्तै मन्दिरमा तामाको छानो छाउने र ढोका-झ्यालहरुमा टुँडाल राखिनेछ । ‘३२ फिट उचाइ हुने मन्दिर पुनर्निर्माण सम्पन्न भएपछि निकै आकर्षक देखिनेछ,’ घिमिरेले भने ।

मन्दिर पुनर्निर्माणका लागि भनेर समितिले केही समय अगाडि महायज्ञ आयोजना गरेको थियो । उक्त महायज्ञमा करिब १ करोड रूपैयाँ दान संकलन भएको थियो । मन्दिर व्यवस्थापन समितिले मन्दिरको डिपिआर तयार गरी भजनकीर्तन भवन, पाटीहरु गोलाकार शैलीमा निर्माण गर्ने योजना बनाएको मन्दिर व्यवस्थापन समितिका अध्यक्ष मीनबहादुर बराई मगरले जानकारी दिए । मन्दिर क्षेत्रमा वनभोजस्थल पनि निर्माण गर्ने योजना छ ।

‘मन्दिरको विकासका लागि गुरुयोजना निर्माण गरेर अगाडि बढेका छौँ, मन्दिरको सर्वांगीण विकासका लागि डिपिआरसमेत तयार भएको छ । डिपिआरबमोजिम मन्दिर क्षेत्रमा पूर्वाधार निर्माणका लागि ४ करोड रूपैयाँ बजेट आवश्यक पर्ने देखिएको छ,’ उनले भने ।

अकलादेवी खुसी भएको बेला मन्दिरभित्र रहेको घण्ट आफैँ हल्लिने र बज्ने गरेको स्थानीयवासीको भनाइ छ । देवी प्रसन्न भएको अवस्थामा रातिको समयमा घण्ट बज्ने गरेको स्थानीयवासी बालहरि घिमिरेले बताए । विसं २०४२ देखि मन्दिरमा शंख र घण्ट बजेको सुनिन थालेको स्थानीयवासी बताउँछन् ।

मन्दिरमा नौ वर्षदेखि पुजारीका रुपमा कार्यरत टोपबहादुर सारूले देवीको शक्तिका कारण मन्दिरमा रहेको घण्ट आफैँ हल्लिने गरेको बताए । उनका अनुसार मन्दिरमा दैनिक ५०-६० जना भक्तजन पूजाआजाका लागि आउने गर्छन् ।

विसं २०५५ मा मन्दिरमा योगी नरहरिनाथले ८५औँ कोटी होम लगाउएका थिए । यस क्षेत्रमा धार्मिक शक्ति भएको कारणले नरहरिनाथले यहाँ कोटी होम लगाएको स्थानीयवासी बताउँछन् । अकला मन्दिरको बाहिर पुरानो आदिकालदेखिको सिंह र नन्दिनी अर्थात् साँढेको स्तम्भ छ ।

मन्दिर नजिकै पञ्चबलि दिने स्थान र हवनकुण्ड पनि छ । अकलादेवी मन्दिरको दक्षिण पश्चिममा रुद्रदेवीको मन्दिर छ । अकलादेवी र रुद्रदेवीको महिमाका लागि वर्षमा चारवटा रुद्री लगाउने गरिन्छ । यस ठाउँमा हरेक वर्ष वैशाख, साउन, कात्तिक र माघमा रुद्री लगाउने प्रचलन रहिआएको छ । (रासस)

प्रकाशित समय १२:३३ बजे

vayodha-hospital
NCC Bank

प्रतिक्रिया दिनुहोस्

सम्बन्धित शीर्षकहरु