fbpx
Nepal Mediciti

गृहपृष्ठ नियमित स्वास्थ्य जाँच गराउने सुत्केरीलाई प्रोत्साहन भत्ता

नियमित स्वास्थ्य जाँच गराउने सुत्केरीलाई प्रोत्साहन भत्ता

सुत्केरी भएपछि नियमित स्वास्थ्य जाँच गराउने महिलालाई कञ्चनपुरको कृष्णपुर नगरपालिकाले प्रोत्साहनस्वरुप ५ सय रूपैयाँ भत्ता दिँदै आएको छ ।

सुत्केरी भएपछि नियमित रूपमा गराउनुपर्ने स्वास्थ्य जाँच गराउन प्रोत्साहनस्वरुप महिलालाई भत्ताको व्यवस्था गरिएको नगरपालिकाका स्वास्थ्य संयोजक गजेन्द्र विष्टले बताए । ‘स्वास्थ्य जाँच नगराउँदा आमा र बच्चाको ज्यान जोखिममा पर्ने खतरा बढ्न थालेपछि नगरपालिकाले भत्ता दिने निर्णय गत वर्ष गरेको थियो,’ संयोजक विष्टले भने, ‘नगरपालिकाले नगरभित्रका महिलाको सवालमा यस्तो पहल गरेको हो ।’

सुत्केरी भएपछि २४ घण्टा, तीन दिन र सात दिनमा गराउनुपर्ने स्वास्थ्य जाँच नियमित रूपमा गर्ने महिलालाई ५ सय रूपैयाँ दिने व्यवस्था नगरपालिकाले गरेको छ । गत आर्थिक वर्ष नगरपालिकाले प्रोत्साहनस्वरुप स्वास्थ्य जाँच गराउँदा ३ सय रूपैयाँका दरले भत्ता वितरण गरेको थियो । ‘चालु आवबाट भत्ता रकम बढाएर ५ सय रूपैयाँ पुर्‍याएका छौँ,’ विष्टले भने, ‘नियमित जाँच नगराउँदा रक्तश्राव र बच्चाको तौल कम हुनेजस्ता समस्या देखा पर्न सक्छन् ।’

स्वास्थ्य जाँच गराएबापत प्रोत्साहन रकम पाइने भएपछि नगरपालिकाका अधिकांश सुत्केरी महिलाले नियमित स्वास्थ्य जाँच गर्न थालेको नगरपालिकाले जनाएको छ । गत आर्थिक वर्षमा भने ४४३ महिलाले सुत्केरीपछि नियमित स्वास्थ्य जाँच गराएको नगरपालिकाले जनाएको छ ।

त्यसैगरी चालु आवदेखि नगरपालिकाले ‘उपप्रमुख’ सुत्केरी स्याहार कार्यक्रमसमेत लागू गरेको छ । उक्त कार्यक्रमबाट सुत्केरी महिलाले २ हजार रूपैयाँ बराबरको सामान पाउनेछन् । विष्टका अनुसार ७५ प्रतिशतभन्दा बढी महिलाले नियमित रूपमा सुत्केरीपछिको स्वास्थ्य जाँच गराउँदै आएका छन् ।

नगरपालिकामा आर्थिक २०७४/७५ मा ५४९ महिला सुत्केरी भएकामा ५२ महिला मात्रै नियमित स्वास्थ्य जाँच गराउन स्वास्थ्य संस्थामा आएका थिए । (रासस)

प्रकाशित समय ११:२१ बजे

vayodha-hospital
NCC Bank

प्रतिक्रिया दिनुहोस्

सम्बन्धित शीर्षकहरु