fbpx
Rashifal Ad

गृहपृष्ठ त्रिविले रामपुरमा इन्जिनियरिङ क्याम्पस सञ्चालन गर्ने

त्रिविले रामपुरमा इन्जिनियरिङ क्याम्पस सञ्चालन गर्ने

त्रिभुवन विश्वविद्यालयले रामपुरमा इन्जिनियरिङ क्याम्पस सञ्चालन गर्ने भएको छ । हाल कृषि तथा वन विज्ञान विश्वविद्यालय रहेको उक्त क्याम्पस सञ्चालन गर्न लागिएको हो । उक्त विश्वविद्यालयको इन्जिनियरिङ संकायको यो पाँचौँ आंगिक क्याम्पस हो ।

विश्वविद्यालयका इन्जिनियरिङ संकायका डिन प्रा. रामचन्द्र सापकोटाले अन्य क्याम्पससँगै प्रस्तावित क्याम्पसका रुपमा रहेको चितवन इन्जिनियरिङ क्याम्पसको नाम राखेर प्रवेश परीक्षाको सूचना प्रकाशित गरिएको जानकारी दिए । उक्त विश्वविद्यालयले कृषि तथा वन विज्ञान विश्वविद्यालयलाई उपलब्ध गराएर बाँकी रहेको ४० बिघा जमिनमा इन्जिनियरिङ क्याम्पस सञ्चालन गर्न लागेको हो । उक्त स्थानमा रहेको त्रिविको कृषि क्याम्पस हटेपछि इन्जिनियरिङ क्याम्पस सञ्चालन गरिनेछ ।

सापकोटाका अनुसार रामपुरमा उक्त क्याम्पस सञ्चालनका लागि विश्वविद्यालयको कार्यकारी परिषद् र मन्त्रिपरिषद्ले निर्णय गरिसके पनि भौतिक संरचना बनिनसकेका कारण समयमै बजेट निकासा नभए यसै शैक्षिकसत्रबाट क्याम्पस सञ्चालन गर्न कठिन हुनेछ । कम्तीमा एउटा कार्यक्रम भए पनि यसै शैक्षिकसत्रबाट सञ्चालन गर्ने तयारी विश्वविद्यालयले गरेको छ ।

विश्वविद्यालयले रामपुरका लागि विश्वविद्यालय अनुदान आयोगमार्फत सरकारसँग पहिलो चरणका लागि तत्काल १५ करोड रूपैयाँ माग गरेको र यस शैक्षिकसत्रको पढाइ मंसिर १ गतेदेखि गर्ने तयारी गरिरहेको  छ । यो समयमा एउटा कार्यक्रम सञ्चालनका लागि आवश्यक पूर्वाधार बनाउनुपर्ने भएकाले तत्काल सरकारले बजेट उपलब्ध गराएमा सम्भव हुने भन्दै प्रवेश परीक्षाको सूचनामै प्रस्तावित क्याम्पसको नाम राखिएको हो । रामपुरमा सातवटा कार्यक्रम सञ्चालन गर्ने तयारी विश्वविद्यालयको भएको उनले जानकारी दिए ।

सम्पूर्ण कार्यक्रम सञ्चालन गर्न १९१ प्राध्यापक र १२८ कर्मचारी आवश्यक पर्ने, काठमाडौँको पुल्चोक र पोखरामा रहेका इन्जिनियरिङ क्याम्पसजस्तै व्यवस्थित क्याम्पस रामपुरमा पनि निर्माण गर्न लागिएकाले १६ अर्ब हाराहारी खर्च लाग्ने विश्वविद्यालयको अनुमान छ ।

रामपुरमा क्याम्पस सञ्चालनका लागि भरतपुर महानगरपालिकाले आवश्यक सहयोग गर्ने जनाउँदै आएको छ । महानगरप्रमुख रेनु दाहालले आवश्यक बजेटका लागि सरकारसँग पहल गर्ने र नपुग केही बजेट आवश्यक भएमा महानगरले पनि सहयोग गर्ने बताइन् । रामपुरमा त्रिभुवन विश्वविद्यालयको इन्जिनियरिङ क्याम्पस सञ्चालनका लागि आफू महानगरप्रमुख भएदेखि नै पहल गर्दै आएको जानकारी दिँदै उनले यसै शैक्षिकसत्रबाट कक्षा सञ्चालनका लागि आवश्यक पहल र सहयोग गरिने जानकारी दिइन् ।

विश्वविद्यालयका उपकुलपति प्रा. डा. तीर्थ खनियाँ चितवनवासी हुन् । कार्यकाल सकिनै लाग्दा रामपुरमा इन्जिनियरिङ क्याम्पस सुरु गर्ने धोको आफूमा रहेको खनियाँले बताउँदै आएका छन् । इन्जिनियरिङतर्फ त्रिभुवन विश्वविद्यालयबाट सम्बन्धन पाएका १० निजी क्याम्पस छन् । विश्वविद्यालयले यसै वर्ष केमिकल इन्जिनियरिङ विषयसमेत पढाउने तयारी गरेको छ । योसँगै इन्जिनियरिङ संकायमा १२ विषयको पढाइ हुने भएको छ । विद्यार्थीको पहिलो रोजाइमा त्रिभुवन विश्वविद्यालयको आंगिक इन्जिनियरिङ क्याम्पस पर्ने गर्दछ । (रासस)

प्रकाशित समय १५:०० बजे

vayodha-hospital
NCC Bank

प्रतिक्रिया दिनुहोस्

सम्बन्धित शीर्षकहरु