fbpx

गृहपृष्ठ सूर्योदयमा चिया परीक्षण केन्द्र निर्माण हुने

सूर्योदयमा चिया परीक्षण केन्द्र निर्माण हुने

चिया किसानले लामो समयदेखि उठाउँदै आएको ‘चिया परीक्षण केन्द्र’ निर्माणको माग अब पूरा हुने भएको छ । मुलुकमै पहिलोपटक चियाको गुणस्तर सुधार गर्न यहाँको सूर्योदय नगरपालिकामा चिया परीक्षण केन्द्र निर्माण हुने भएको हो ।

दुई वर्षभित्र सम्पन्न हुने केन्द्रको बहुतले भवन निर्माणका लागि प्रदेश सरकारले आगामी आर्थिक वर्षको बजेटमा पाँच करोड रुपैयाँ विनियोजन गरेको छ । उक्त कार्यमा साझेदारी गर्न आवश्यक बजेट विनियोजन गर्ने सूर्योदय नगरपालिका प्रमुख रणबहादुर राईले बताए । ‘चिया परीक्षण केन्द्र बनाउन प्रदेश सरकारले पाँच करोड रुपैयाँ विनियोजन गरेको छ,’ उनले भने, ’प्रदेश सरकारसँग हामीले साझेदारी गर्नुपर्ने आवश्यक रकम हामी विनियोजन गर्छौं ।’

२६ करोड रूपैयाँको लागतमा निर्माण हुने केन्द्रको भवनका लागि प्रदेश सरकारको ८० र नगरपालिकाको २० प्रतिशत साझेदारी हुनेछ । परीक्षण केन्द्र निर्माण भएपछि इलामको अर्थोडक्स चियाको बजार प्रवर्धनमा ठूलो सहयोग पुग्ने विश्वास चियाको किसानको छ । परीक्षण केन्द्रको विस्तृत परियोजना प्रतिवेदन र डिजाइन स्टिमेट तयार भइसकेकाले निर्धारित मितिभित्र नै निर्माण सकिने नगरप्रमुख राईले बताए ।

चियाको प्रांगारिक परीक्षण पनि गरिने

यहाँ निर्माण हुन लागेको चिया परीक्षण भवनमा चियाको प्रांगारिक परीक्षणसमेत गरिने जनाइएको छ । धेरै झन्झट गरेर ठूलो मूल्यमा विदेश लगेर चियाको प्रांगारिक परीक्षण गर्ने काम पनि यो भवन निर्माणपछि अन्त्य हुने भएको छ ।

सूर्योदय नगरपालिकाका प्रमुख रणबहादुर राईका अनुसार प्रांगारिक परीक्षणको सबै प्रक्रिया यहीँ गरिने र अन्तिम नतिजाका लागि मात्र विदेश पठाइनेछ । योसँगै यहाँ चियाको सूचना केन्द्रसमेत निर्माण गरिने छ ।

चियासम्बन्धी जानकारीमूलक विषयको सोधखोजका लागि यहाँ सूचना केन्द्र निर्माण गर्न लागिएको हो । चिया व्यवसायी सोमन योल्मोले बहुउपयोगी प्रयोगका लागि निर्माण हुने यो भवन चियाको बजारीकरणमा देखिएको समस्या हल हुन सक्ने बताए  । (रासस)

प्रकाशित समय १४:४५ बजे

vayodha-hospital
NCC Bank

प्रतिक्रिया दिनुहोस्

सम्बन्धित शीर्षकहरु