fbpx
Rashifal Ad
Nepal Mediciti

गृहपृष्ठ नेपालमा लगानी भित्र्याउन महिलामन्त्री थापाको प्रवासीलाई आग्रह

नेपालमा लगानी भित्र्याउन महिलामन्त्री थापाको प्रवासीलाई आग्रह

thammaya_thapa

महिला, बालबालिका तथा ज्येष्ठ नागरिकमन्त्री थममाया थापाले लगानी भित्र्याउन प्रवासीहरुलाई आग्रह गरेकी छन् । अन्नपूर्ण गाउँपालिका–६ घोडेपानीमा मंगलबार प्रवासी नेपाली म्याग्देली संघ (मोना) अन्तर्राष्ट्रिय कार्यसमितिको तेस्रो महाधिवेशन तथा पाँचौँ साधारणसभाको उद्घाटन गर्दै उनले लगानी भित्र्याउन आग्रह गरेकी हुन् ।

‘स्थिर सरकार भएकाले नेपालमा लगानीको वातावरण बनेको छ,’ उनले भनिन्, ‘विदेशमा आर्जेको सीप, पुँजी र प्रविधिलाई स्वदेशमा भित्र्याएर राष्ट्र निर्माणमा योगदान गर्नुहोस् ।’ उत्पादनमूलक क्षेत्रमा वैदेशिक लगानी भित्र्याउन सरकारले अनुकूल नीतिगत व्यवस्था र वातावरण बनाएको मन्त्री थापाको भनाइ छ । पूर्वाधार तयार र लगानीको सुरक्षा गर्न सरकार सक्षम भएको बताइन् ।

जिल्लाको जलविद्युत्, पर्यटन, व्यावसायिक कृषि र पशुपालन क्षेत्रमा लगानी गर्न प्रशस्त सम्भावना भएको उनले जानकारी गराइन् । सरकारले स्वदेशमै रोजगारी सिर्जना गरेर कामको खोजीमा विदेशिनुपर्ने बाध्यता हटाउन प्रधानमन्त्री रोजगारलाई निरन्तरता दिएको र वैदेशिक रोजगारलाई व्यवस्थित बनाउन खोजेको उनले जनाइन् ।

संविधानसभा सदस्य रेशमबहादुर बानियाँ, जिल्ला समन्वय समितिका प्रमुख देवेन्द्र केसी, नेपाल कम्युनिस्ट पार्टी (नेकपा)का जिल्ला सचिव हरिकृष्ण श्रेष्ठ, नेपाली कांग्रेसका सभापति खम्बिर गर्बुजा, बेनी नगरपालिकाका प्रमुख हरिकुमार श्रेष्ठ, अन्नपूर्ण गाउँपालिकाका अध्यक्ष डमबहादुर पुन र मालिका गाउँपालिकाका अध्यक्ष श्रीप्रसाद रोकाले सम्भावनाको क्षेत्रमा लगानी गर्न आग्रह गरे ।

मोना रोजगारी, पेसा, व्यवसाय र अध्ययनको सिलसिलामा विश्वका विभिन्न देशमा पुगेका म्याग्देलीहरुको साझा संस्था हो । तीन दिनसम्म चल्ने महाधिवेशनमा २० देशका डेढ सय प्रतिनिधि सहभागी भएका मोनाका अध्यक्ष चक्र थापाले बताए ।

विद्यालयलाई २ लाख सहयोग

मोना जापानले २०७५ साउनमा कालीगण्डकीमा आएको बाढीले बगाएको अन्नपूर्ण गाउँपालिका–४ कोप्चेपानीको धवलागिरि आधारभूत विद्यालयलाई २ लाख आर्थिक सहयोग गरेको छ । मोनामार्फत जिल्लाको शिक्षा, स्वास्थ्य र सामाजिक तथा परोपकारी क्षेत्रमा सहयोग गर्दै आएका छन् । बेनी नगरपालिका, मोना र म्याग्दी उद्योग वाणिज्य संघको त्रिपक्षीय साझेदारीमा बेनीदेखि मायालुडाँडा जोड्ने पदमार्ग निर्माण गरिएको छ ।

यसैगरी समस्यामा परेका महिला तथा बालबालिकाको सहयोगका लागि १ करोड रुपैयाँको कोष स्थापना गर्न अभियान चलाइएको छ । साथै ग्रामीण क्षेत्रका ४५ सामुदायिक विद्यालयमा विद्युतीय पुस्तकालय स्थापना गरिएको छ । प्रवासी म्याग्देलीको अगुवाइमा २५ मेगावाट क्षमताको दरवाङ म्याग्दीखोला जलविद्युत् आयोजना निर्माणसमेत सुरु गरिएको छ ।

प्रकाशित समय ०७:३५ बजे

vayodha-hospital
NCC Bank

प्रतिक्रिया दिनुहोस्

सम्बन्धित शीर्षकहरु