नेपाली सेनाका प्रधान सेनापति प्रभुराम शर्मा औपचारिक भ्रमणको लागि लेबनानतर्फ प्रस्थान गरेका छन् । प्रधान सेनापति शर्मालाई त्रिभुवन अन्तर्राष्ट्रिय विमानस्थलको भीआईपी कक्षमा बलाधिकृत रथी बालकृष्ण कार्कीले बिदाइ गरेका थिए ।

शनिबार बिहान प्रधान सेनापति शर्माको नेतृत्वमा रक्षा सचिवसहित सात सदस्यीय टोली लेबनानतर्फ गएका हुन् । द्वन्दग्रस्त क्षेत्रमा शान्ति स्थापनार्थ तैनाथ फौजको हौसला बढाउन र यूएन मिसनहरूको विविध पक्ष एवं भावी योजनाको बारेमा जानकारी लिन सो टोली लेबनान प्रस्थान गरेको नेपाली सेनाले जानकारी दिएको छ ।

टोलीले शनिबार देखि असार १० गते शुक्रबारसम्म संयुक्त राष्ट्र संघको आह्वानमा शान्ति स्थापनार्थ नेपाली सैनिकहरू तैनाथ लेबनान र त्यसपछि सिरियाका मिसनको निरीक्षण भ्रमण गर्नेछन् । मिशनहरूको वस्तुस्थिति, अपरेशनल गतिविधि, फौज तैनाथीको अवस्थालगायत अन्य विविध पक्षहरूका बारेमा जानकारी लिने नेपाली सेनाले जनाएको छ ।

भ्रमणका क्रममा प्रधान सेनापति शर्माले लेबनान, सिरिया, यूएनआइएफआइएल र युएनडीओएफ मिशनका उच्च पदस्थ अधिकारीसँग भेटघाट गर्नेछन् । यो भ्रमणपछि प्रधान सेनापति शर्मा अमेरिकाको औपचारिक भ्रमणको लागि जाने तालिका छ । प्रधानसेनापति शर्मा असार १९ गते नेपाल फर्किनेछन् ।

उनको भ्रमण अवधिभर बलाधिकृत रथी बालकृष्ण कार्कीले कायम मुकायम प्रधान सेनापतिको कार्यभार सम्हाल्नेछन् ।

प्रकाशित समय : १९:०३ बजे