उच्च शिक्षाका लागि विदेश जाने तथा वैदेशिक रोजगारप्रतिको आकर्षणले निजामती सेवामा म्याग्देलीहरुको पहुँच बढ्न सकेको छैन् । तर पछिल्लो समय स्वदेशमै अध्ययन गरी निजामती सेवाबाट सरकारी जागिरतर्फ प्रवेश गर्नेहरुको आकर्षण बढ्दै गएको छ । ६ वटा स्थानीय तह रहेको म्याग्दीमा तीन स्थानीय तहको प्रमुख प्रशासकीय अधिकृत म्याग्देली नै बनेका छन्, त्यो पनि एकै ठाउँका ।

मंगला, रघुगंगा र धवलागिरि गाउँपालिकाको प्रमुख प्रशासकीय अधिकृत बेनी नगरपालिका-६ अर्थुंगेका क्रमश: मनोहर ढुंगाना, अमृत सुवेदी र पूर्णबहादुर खत्री हुन् । मंगलाका प्रमुख प्रशासकीय अधिकृत ढुंगाना २०७३, रघुगंगाका प्रमुख प्रशासकीय अधिकृत सुवेदी २०७४ र धवलागिरिका प्रमुख प्रशासकीय अधिकृत खत्री २०७८ मा निजामती सेवा राजपत्रांकित तृतीय श्रेणी (शाखा अधिकृत) पदमा खुल्ला प्रतिस्पर्धाबाट सिफारिस भएका हुन् ।

रघुगंगाका प्रमुख प्रशासकीय अधिकृत सुवेदीले २०६९ सालमा खरिदारबाट निजामती सेवामा प्रवेश गरेका थिए । क्रमश: सुब्बा हुँदै अधिकृत पदमा पुगेका हुन् । मंगलाका प्रमुख प्रशासकीय अधिकृत ढुंगानाले २०६८ सालमा न्याय सेवातर्फ खरिदारबाट निजामती सेवामा प्रवेश गरेका थिए ।

तीनैजना अधिकृतले अर्थुंगेकै जामुनाखर्क माविबाट विद्यालय तहको पठनपाठन गरेका थिए । विद्यालयका पूर्वविद्यार्थीहरु गृहजिल्लाकै तीन पालिकाको प्रमुख प्रशासकीय अधिकृतको जिम्मेवारीमा पुगेकाे गौरवको विषय भएको जामुनाखर्क माविका प्रधानध्यापक सोमनाथ ढुंगानाले बताए । 'विद्यालयमा अध्ययन गरेका विद्यार्थीहरु राज्यको उच्च पदस्थ स्थानमा पुग्नेक्रम बढेको छ, पूर्वविद्यार्थिहरु निजामती, शिक्षक सेवा र बैंकिंङ क्षेत्रमा ठूलै संख्या आबद्ध छन्, विद्यालयका लागि गौरव र अन्य विद्यार्थीहरुका लागि प्रेरणाका रुपमा लिएका छाैँ,' प्रअ ढुंगानले भने ।

यस विद्यालयले विभिन्न समयमा निजामती, शिक्षक सेवा लगायतका सरकारी सेवा प्रवेशमा विद्यार्थीहरुको उत्सुकता बढाउन अभिमुखीकरण लगायतका कामहरु गर्दै आएको छ । सोही विद्यालयमै अध्ययन गर्नुभएका नगेन्द्र सुवेदी (२०७५) थासाङ गाउँपालिकाको प्रमुख प्रशासकीय अधिकृत हुन् । शान्ति पौडेल (२०७३) संघीय मामिला तथा सामान्य प्रशासन मन्त्रालयमा शाखा अधिकृत, यसोदा सुवेदी (२०७४) पर्वतको फलेवास नगरपालिकाको लेखा अधिकृत र रामप्रसाद पौडेल (२०७५) गण्डकी प्रदेश मुख्यमन्त्रीको कार्यालयमा शाखा अधिकृतमा कार्यरत छन् ।

प्रकाशित समय : १९:१८ बजे