भारतमा जारी साफ यू-१८ महिला च्याम्पियनशिप फुटबल प्रतियोगिताअन्तर्गत आफ्नो अन्तिम खेलमा नेपालले आज बंगलादेशसँग खेल्दैछ । भारतको जमसेदपुरस्थित जेआरडी टाटा कम्प्लेक्समा नेपालले बलियो टोली बंगलादेशको सामना गर्दै प्रतियोगिताको समापन गर्नेछ । नेपाल र बंगलादेशबीचको खेल नेपाली समयानुसार बेलुका ७ः१५ बजे सुरु हुनेछ । आज बंगलादेशलाई हराउँदै नेपाल पहिलो जित निकाल्न चाहन्छ तर बंगलादेशलाई पराजित गर्न सजिलो भने छैन ।

च्याम्पियनशिपको पहिलो भेटमा नेपाल बलादेशसँग पराजित भएको थियो । नेपाल उक्त हारको बदला लिन चाहन्छ भने बंगलादेश आफ्नो जितलाई कायम राख्न चाहन्छ । नेपाल, भारत र बंगलादेश सहभागी उक्त च्याम्पियनशिपमा नेपालले लगातार तीन खेलमा पराजय भोगेको छ । नेपाल भातरसँग ७-०, बंगलादेशसँग ४-२ र भारतसँग पुन ५-१ गोलअन्तरले पराजित भएको छ ।

तीन खेल खेलेको भारतले तीन खेलमा नै विजयी हुँदै नौ अंक जोडेको छ । भारत अंक तालिकाको शीर्ष स्थानमा छ । दुई खेल खेलेको बंगलादेशले तीन अंक जोडेको छ । बंगलादेश अंक तालिकाको दोस्रो स्थानमा छ । अंक विहीन रहेको नेपाल भने अंक तालिकाको अन्तिम स्थानमा छ । डबल राउण्ड रोविनको आधारमा जारी उक्त च्याम्पियनशिपको शीर्ष टोलीले उपाधि जित्नेछ ।

प्रकाशित समय : १८:२८ बजे