Nepalese Flag २०७८ वैशाख २४ गते शुक्रबार   |   May 07, 2021

मुख्यमन्त्री शाहीद्वारा प्रदेश अस्पताल अनुगमन

न्युज कारोबार काठमाडौं वैशाख १८, २०७८       

मुख्यमन्त्री शाहीद्वारा प्रदेश अस्पताल अनुगमन

कर्णाली प्रदेश सरकारका मुख्यमन्त्री महेन्द्रबहादुर शाहीले प्रदेश अस्पतालको छड्के अनुगमन तथा निरीक्षण गरेका छन् । सामाजिक विकास मन्त्रालयसमेत सम्हालेका मुख्यमन्त्री शाहीले शुक्रबार साँझ प्रदेश अस्पताल सुर्खेतको अनुगमन गरेका हुन् । कर्णालीमा पछिल्लो २४ घण्टामा आठ जना संक्रमितको मृत्यु भएपछि उनले अस्पताल पुगेर बिरामीहरूको उपचार अवस्थाबारे जानकारी लिएका हुन् ।

आर्थिक मामिला तथा योजना मन्त्री बिमला केसीसहित अस्पताल पुगेका मुख्यमन्त्री शाहीले कोरोना सङ्क्रमितहरू रहेको आइसोलेसन वार्डको निरीक्षण गरे । अस्पतालको सेवा तथा बिरामीहरूको अवस्थाको अनुगमन तथा निरीक्षणको क्रममा उनले अस्पताल निर्देशक डा. डम्बर खड्का र कोरोना सम्पर्क व्यक्ति डा. केएन पौडेलसँग उपचार सेवा प्रभावबारे जानकारी लिए ।

अनुगमनपश्चात अस्पतालका निर्देशक डा. खड्कासहित चिकित्सकहरूलाई उपचार सेवा प्रभावकारी बनाउन निर्देशन दिए । कोभिड उपचारका लागि अग्रभागमा रही सेवा गरिरहेका स्वास्थ्यकर्मीहरूका गुनासो एवं समस्याबारे पनि उनले जानकारी लिएका थिए । स्वास्थ्य सेवा निर्देशनालय कर्णाली प्रदेशले शुक्रबार बेलुका वीरेन्द्रनगर नगरपालिका १० सुर्खेतका ३२ वर्षीय महिलाको मृत्यु भएको जनाएको छ । योसँगै कर्णालीमा कोरोना संक्रमणबाट मृत्यु हुनेको संख्या ४८ पुगेको छ । कर्णाली प्रदेशमा २५३ जना नयाँ संक्रमित थपिएका छन् । योसँगै संक्रमित हुनेको संख्या ९ हजार ३४७ पुगेको निर्देशनालयले जनाएको छ ।

सम्बन्धित खबरहरु