काठमाडौं, फागुन ३ । लामो समय विवादमा अल्झेर निर्माणमा हुन गइरहेकोे १३२ केभी सोलु कोरिडोर (प्रसारण लाइन) अबको करिब एक वर्षभित्रमा पूरा गर्ने नेपाल विद्युत् प्राधिकरणले बताए । धमाधम काम भइरहेकाले २०७५ चैतभित्रै पुरा गर्ने लक्ष्य छ ।

मिर्चैया–सोलुुखुम्बु ९० किलोमिटर प्रसारण लाइन ३ महिनामा १८ प्रतिशत पूरा भएको आयोजना प्रमुख जनार्दनप्रसाद गौतमले बताए । ‘अवरोध नभएका ठाउँमा २१ वटा फाउन्डेसन (टावर गाड्ने जग) तयार भएको छ,’ ‘एक सातामा टावर ठड्याउन सुरु गरिनेछ ।’

कुनै प्रकारको अवरोध नभए निर्धारित समय र तालिका अनुसार कार्य सम्पर्ण गर्ने सम्भावना छ । गत पुस १३ गते लाइन निर्माण हुने जिल्लाको रुख कटान गर्न मन्त्रिपरिषद्ले स्वीकृति दिएको छ ।

सिराहा र उदयपुरमा टावर राख्ने र तार तान्ने स्थानका ८ हजार २ सय रुख काट्नुपर्ने छ । सरकारको स्वीकृतिपछि कटान हुने रुख चिनो लगाउन सुरु गरिएको प्राधिकरणले जनाएको छ ।

भारतीय एक्जिम बैंकको ऋण लगानी रहेको प्रसारण लाइन भारतकै मोहन इनर्जी कर्पोरेशनले निर्माण गरिरहेको छ । यो प्रसारण लाइन २ अर्ब ९० करोड रुपैयाँमा सम्पन्न गर्ने लक्ष्य छ ।

सिराहा, उदयपुर, ओखलढुङ्गा र सोलुखुम्बुलाई प्रसारण लाइन आयोजनाले छुने हुँदा स्थानीय अवरोध धेरै हुने गरेको गौतमले बताए । रुख कटान, मुआब्जा वितरणलगायत विषयमा स्थानीयसँग सहमति नजुट्दा आयोजना अघि बढाउन समसया हुने गरेको उनले बताए ।

गौतमका अनुसार सिराहामा जग्गा अधिग्रहणको सकिएको छ । उदयपुर, ओखलढुङ्गा र सोलुखुम्बुको जग्गा अधिग्रहण प्रक्रिया क्रमशः अघि बढ्नेछ । मुआब्जा वितरण प्रक्रिया सहज भए एक वर्षमा प्रसारण लाइन तयार हुन्छ ।

९० किलोमिटर दूरीमा ३ सय ३ वटा टावर निर्माण हुनेछन् । मिर्चैया र तिन्लामा एक एक सबस्टेसन राखिनेछ । मिर्चैयास्थित सबस्टेसनको निर्माण पूरा भएको छ भने तिन्लाको काम सुरु भएको छैन ।

सोलु कोरिडोरमा निर्माणाधीन आयोजना

यो प्रसारण लाइनमा निर्माणाधीन २ सय १५ मेगावाटका ५ जलविद्युत् आयोजना जोडिनेछन् । सोलु कोरिडोरमा अहिले ५.२ मेगावाटको जुनबेँसी, १८ मेगावाटको माथिल्लो सोलु, २३.५ मेगावाटको सोलु, ८२ मेगावाटको तल्लो सोलु र ८६ मेगावाटको सोलु–दूधकोसी निर्माणमाधीन छन् । २.८ मेगावाटको सिसा खोला निर्माणमा जाने तयारीमा छ ।

निर्माणाधीन आयोजनामध्ये सोलु र तल्लो सोलु सरकारले प्रतिस्पर्धामा निजी क्षेत्रलाई निर्माण गर्न दिएका (सुपर सिक्स) आयोजना हुन् । यी दुवै आयोजनाबाट अबको डेढ वर्षमा विद्युत् उत्पादन हुनेछ । सोलु २०७५ असार र तल्लो सोलु २०७६ पुसमा पूरा हुने यसका प्रवद्र्धकले जानकारी दिएका छन् ।

प्राधिकरणले समयमै लाइन निर्माण गर्ने दाबी गरे पनि कामको सुस्तताले विद्युत् खेर जाने प्रवद्र्धकको चिन्ता छ । समयमा प्रसारण लाइन नबने प्राधिकरणले र आयोजना तयार नभए प्रवद्र्धकले ४५ प्रतिशत क्षतिपूर्ति तिर्नुपर्ने प्रावधान छ ।

प्रकाशित समय : १९:३४ बजे