nmb bank

गृहपृष्ठ कर्णालीको राजधानी सुर्खेतमा दैनिक २७ लाख लिटर पानी अभाव

कर्णालीको राजधानी सुर्खेतमा दैनिक २७ लाख लिटर पानी अभाव

कर्णालीको राजधानी सुर्खेतमा दैनिक २७ लाख लिटर पानी अभाव


सुर्खेत । कर्णाली प्रदेशको राजधानी वीरेन्द्रनगरमा सुर्खेत उपत्यका खानेपानी उपभोक्ता संस्थाले दैनिक १ करोड १० लाख लिटर पानी उपलब्ध गराइरहेको छ । तर, यहाँका डेढ लाख जनसंख्याका लागि भने यो पर्याप्त छैन । जनसंख्याको चाप दिन प्रतिदिन बढ्दै गइरहेको प्रदेश राजधानीमा पानीको अभाव बढ्दै गएको छ ।
वीरेन्द्रनगरमा अहिले नै प्रतिदिन २७ लाख लिटर पानी अपुग छ । गर्मीयाम सुरु भएसँगै दैनिक ४५ लाख लिटर पानी अपुग हुने सुर्खेत उपत्यका खानेपानी उपभोक्ता संस्थाको आँकलन छ । जनसंख्याको चाप बढेसँगै खानेपानी अभावको समस्या थप चर्को हुँदै जाने देखिन्छ । खानेपानीका अन्य पर्याप्त स्रोत नहुँदा र सुर्खेतमा खानेपानी वितरण गर्दै आएको सुर्खेत उपत्यका खानेपानी संस्थाले पानी पुर्याउन नसक्दा उपभोक्तालाई समस्या भएको छ ।
सुर्खेत उपत्यकामा करिब २० वर्षसम्मका लागि पर्याप्त पानी वितरण गर्न सकिने लक्ष्यसहित झुप्रा बृहत् खानेपानी तथा सरसफाई उपभोक्ता संस्थाले आयोजना सञ्चालनमा ल्याएको थियो । संस्थाले झुप्रा बृहत् आयोजना २०५६ सालबाट निमार्ण सुरु गरेर २०६७ सालबाट पानी वितरण सुरु गरेको थियो । बढ्दो जनसंख्यालाई आँकलन नगरी २० वर्षका लागि पर्याप्त पानी पुर्याउने संस्थाको लक्ष्य तीन वर्ष नबित्दै असफल हुन पुग्यो ।
पानी वितरण सुरु गरेपछि २० वर्ष पानीको समस्या नहुनेमा ढुक्क भएका वीरेन्द्रनगरबासी ३ वर्ष नपुग्दै खानेपानीको अभावबाट ग्रसित हुन पुगे । झुप्रा खोलाको पानीलाई शुद्ध गरेर सुर्खेत उपत्यकामा पानी वितरण गरे पनि उपभोक्ताको माग अनुसार आपूर्ति हुन सकेको छैन । हरेक वर्ष गर्मी समयमा यहाँका उपभोक्ताले खानेपानीको समस्या झेल्दै आएका छन् ।

दुई वर्षभित्र भेरीको पानी
प्रदेश राजधानी वीरेन्द्रनगरको खानेपानीको संकट टार्नका लागि भेरी नदीको पानी लिफ्ट गरेर उपत्यकामा ल्याउने योजना अघि साएिको छ । यसका लागि विस्तृत सम्भाव्यता अध्ययन समेत भइसकेको छ । आयोजनाका प्रमुख डम्बर गौतमले भेरीबाट लिफ्ट गरेर प्रतिसेकेन्ड ७ सय लिटर पानी उपत्यकामा ल्याउनेगरी अध्ययन भएको जानकारी दिए ।
उनले उपत्यकाको खानेपानी अभाव टार्न भेरीको पानी ल्याउनुको विकल्प नभएको जनाए । आयोजनाका अध्यक्ष कूलमणि देवकोटले चालू आर्थिक वर्ष्भित्रै भेरी लिफ्टिङ खानेपानी आयोजनाको टेन्डर आह्वान गर्ने तयारी गरेको जानकारी दिए । ‘तत्काल यो आयोजनाको डिपिआरको तयारी हुँदैछ,’ देवकोटाले भने, ‘अबको २ वर्षभित्र कुनै पनि हालतमा भेरीको पानी उपत्यकामा ल्याउनेछौं । यसका लागि संस्था पूर्णरूपमा कसरत गरिरहेको छ ।’

प्रकाशित समय : २१:२० बजे

प्रतिक्रिया दिनुहोस्

सम्बन्धित शीर्षकहरु