Nepalese Flag २०७७ फागुन १९ गते बुधबार   |   March 03, 2021

चितवनको भरतपुर महानगरपालिकामा एकसाथ अघि बढे दसौँ ठूला आयोजना

न्युज कारोबार काठमाडौं फागुन १, २०७७       

चितवनको भरतपुर महानगरपालिकामा एकसाथ अघि बढे दसौँ ठूला आयोजना
गाउँदेखि सहरसम्म मिलाएर बनेको भरतपुर महानगरपालिकाले विकासमा गति लिएको छ । स्थानीय जनप्रतिनिधि आएसँगै सानादेखि ठूला परियोजना निर्माण हुन थालेका छन् । महानगरमा महानगरपालिका, बागमती प्रदेश सरकार र संघ सरकारका आयोजना सञ्चालनमा आएसँगै विकासका कामले गति लिएका छन् । महानगरपालिकको अगुवाइमा प्रदेश र संघ सरकारको साथका कारण महानगरमा ठूला आयोजना अघि बढेका छन् । भरतपुरभित्र एक दर्जनभन्दा बढी आयोजना निर्माणाधीन र निर्माणको तयारीमा छन् । गौतमबुद्ध अन्तर्राष्ट्रिय क्रिकेट रंगशाला, भरतपुर महानगर सिटी हल, पुल्चोक–गोन्द्राङ ६ लेन सडक, नारायणी नदीकिनार आयोजना, हुलाकी सडक, उद्योग ग्राम, चौबीसकोठी–मेघौली सडक, रिङरोड र लिंक रोडको काम धमाधम भइरहेको छ । नारायणगढको लायन्स चोकमा बहुद्देश्यीय भवन, भरतपुर विमानस्थल विस्तार, स्मार्ट सडक बत्तीजस्ता परियोजना सञ्चालनको तयारीमा छन् । महानगर प्रमुख रेनु दाहालका अनुसार क्रिकेट रंगशालाका लागि महानगरकै पहलमा जग्गा खोजी गरी काम तीव्र गतिमा अघि बढिरहेको छ । धुर्मुस–सुन्तली फाउन्डेसनले निर्माण अघि बढाएको हो । यो परियोजना सम्पन्न भएसँगै अन्तर्राष्ट्रिय स्तरका खेल यहाँ हुनेछन्, जुन नेपालको महत्वपूर्ण परियोजनामध्येको एक बन्ने दाहालको भनाइ छ । यो आयोजना निर्माणको काम रातदिन भइरहेको छ । भरतपुर महानगरपालिकाको वडा नम्बर १ र ३ को नारायणी नदीकिनारालाई ‘सी बिच मोडेल’मा विकास गरी स्वदेशी तथा विदेशी पर्यटक आकर्षण गर्ने र आर्थिक क्रियाकलापमा बढाउने गरी काम अगाडि बढाइएको छ । नगर प्रमुख दाहालका अनुसार यसका लागि गत वर्ष महानगरबाट एक करोड रकम खर्च भई फुटपाथ बनेको छ । चालू आर्थिक वर्षमा पर्यटन मन्त्रालयबाट करिब सात करोडको बोलपत्र आह्वान भइसकेको छ । यससँगै यो क्षेत्रमा आन्तरिक र बाह्य पर्यटन प्रवर्धनमा महत्वपूर्ण योगदान पुग्ने विश्वास लिइएको छ । यस्तै भरतपुर महानगरपालिका ११ को गणेशस्थानलाई गणेशधामका रुपमा विकास गर्ने धमाधम काम भइरहेको छ । उक्त ठाउँमा पानी पोखरी, मन्दिर, पार्कलगायतका संरचना बन्नेछन् । गणेशधामलाई धार्मिक पर्यटकीय क्षेत्रका रुपमा विकास गर्न लागिएको प्रमुख दाहालले बताइन् । बाइपास सडक किनारमा सिटीहल निर्माणले पनि तीव्रता पाएको छ । केन्द्र सरकारको ७७ करोड ७७ लाख बजेटमा सघन सहरी तथा भवन आयोजनाबाट ठेक्का सम्झौता भई निर्माण अघि बढेको हो । महानगरकै पहलमा जिल्ला समन्वय समितिको जमिन महानगरको नाममा ल्याएर काम अगाडि बढाइएको दाहालले जानकारी दिइन् । 'हाम्रो तेस्रो प्रयासपछि महत्वपूर्ण आयोजना अघि बढेको छ । यसले सिंगो चितवनको विकासमा टेवा पुग्ने विश्वास छ,' उनले भनिन् । सँगै रहेको बाइपास सडक विस्तारको काम भइरहेको छ । भरतपुर महानगर क्षेत्रमा पर्ने पूर्व‑पश्चिम राजमार्गलाई आकर्षक ६ लेन सडक बनाइँदै छ । नारायणगढको पुल्चोकदेखि गोन्द्राङसम्म सडक विस्तार गर्न एक अर्ब १२ करोडको ठेक्का सम्झौता भई निर्माण कार्य भइरहेको छ । आधुनिक र व्यवस्थित फुटपाथसहितको सडक निर्माण हुनुका साथै महानगरको सौन्दर्यमा वृद्धि हुने दाहाल बताउँछिन् ।
आधुनिक र व्यवस्थित फुटपाथसहितको सडक निर्माणले महानगरको सौन्दर्यमा वृद्धि हुने नगर प्रमुख रेणु दाहाल बताउँछिन् ।
भरतपुर महानगरपालिका हुँदै चितवनको ठोरीसम्म पुग्ने हुलाकी सडकको काम पनि भइरहेको छ । महानगरभित्र पर्ने हाकिमचोक‑जगतपुर सडकमध्ये हाकिमचोकबाट पकौडीसम्म हालको ६ मिटर सडकलाई सात मिटर कालोपत्रे बनाउने र बाँकी नौ किमी सडकलाई सतह ढल निर्माणसमेत गरी स्तरोन्नति गर्ने कार्य भइरहेको छ । चौबिसकोठी‑ रामपुर‑ चनौली‑ मेघौली सडकखण्डमध्ये हाल रामपुर‑चनौलीखण्ड निर्माण सम्पन्न भएको छ भने चनौली–मेघौली सडकखण्डको निर्माण र मर्मत कार्य अघि बढेको छ । नगर प्रमुख दाहालका अनुसार ६५ किलोमिटर लिंकरोडको काम अघि पनि बढिरहेको छ । यसैगरी भरतपुर महानगरपालिका २० मा प्रदेशस्तरको उद्योगग्राम र वडा नम्बर २१ पार्वतीपुरमा संघीय उद्योग ग्राम निर्माण अघि बढेको छ । पवित्र तीर्थस्थल देवघाटमा विद्युतीय शवदाह स्थल बन्दै छ । महानगरपालिकाभित्र नै नगरबासीलाई शुद्ध र गुणस्तरीय पिउने पानी प्रवाह गर्न व्यवस्थित खानेपानी सञ्जाल निर्माणको काम धमाधम भइरहेको दाहालले जानकारी दिइन् । महानगरभित्र विभिन्न आयोजना गरी खानेपानीतर्फ मात्रै दुई अर्ब ४१ करोडभन्दा बढीका आयोजना सञ्चालनमा रहेको उनको भनाइ छ । महानगर पूरै क्षेत्रलाई शुद्ध खानेपानी वितरण गर्ने लक्ष्यका साथ काम भइरहेको उनले बताइन् । महानगरभित्र रहेको संघीय भरतपुर अस्पताल, बिपी कोइराला मेमोरियल क्यान्सर अस्पताललगायतका स्वास्थ्य संस्थाको स्तरोन्नतिका लागि महानगरले काम गरिरहेको नगर प्रमख दाहाल बताउँछिन् । महानगरभित्र नारायणगढको लायन्स चोकमा बहुद्देश्यीय भवन निजी क्षेत्रमार्फत सम्पन्न गर्न बोलपत्र आह्वान भई प्राविधिक प्रस्तावसमेत पारित भइसकेको छ । तीस वर्षका लागि निजी क्षेत्रलाई उक्त भवन निर्माण र सञ्चालन गर्न दिन लागिएको हो । दाहालका अनुसार सो परियोजनाका लागि निजी क्षेत्रले एक अर्ब ७५ करोड हाराहारी खर्च गर्नेछन्, जहाँ पाँच तारे होटलदेखि अन्य महत्वपूर्ण व्यवसाय रहनेछन् । प्रमुख दाहालले यसलाई महानगरको गहनाको रुपमा चित्रित गर्ने गरेकी छन् । यस्तै महानगरको भरतपुरमा हाल रहेको विमानस्थल विस्तारका लागि काम सुरु भएको छ । विमानस्थल तोकिएको मापदण्डभन्दा कम भई जोखिमयुक्त भएको र हालको मागलाई धान्न ठूला विमान ल्याउन आवश्यकसमेत भएकाले विमानस्थल विस्तार एवं सुधार गर्न लागिएको उनले बताइन् । महानगरपालिकाले विमानस्थल विस्तारका क्रममा स्थानान्तरण गर्नुपर्ने नेपाली सेनाको गण र घोडा प्रजनन केन्द्रका लागि वैकल्पिक जग्गासमेत तयार गरिसकेको जनाएको छ । महानगरपालिकाको मुख्य सहरी क्षेत्रका सडकमा ११ करोड ४९ लाख ८९ हजार लागतमा स्मार्ट बत्ती जडानको काम पनि सुरु हुन थालेको छ । उक्त योजनाको बोलपत्र आह्वान भई काम अघि बढेको छ । महानगरका उपप्रमुख पार्वती शाहले जनप्रतिनिधि आएसँगै महानगरको योजनाबद्ध विकास अघि बढेको बताइन् । 'आवश्यकता र औचित्यका आधारमा विकास अघि बढाइएको छ,' उनले भनिन्, 'महानगरमा ठूला आयोजनासँगै साना धेरै आयोजना अघि बढिरहेका छन् ।' महानगरभित्र अधिकांश सडक कालोपत्र गर्ने काम भइरहेका छन् । व्यवस्थित विकासमा महानगर जुटिरहेको शाह बताउँछिन् । देशकै नमुना सहरका रुपमा भरतपुरलाई विकास गर्ने गरी योजना अघि बढाइरहेको उनको भनाइ छ । यो क्षेत्रका प्रदेशसभा सदस्य विजय सुवेदीले तीन तहको सरकारको समन्वयमा भौतिक विकासका काम अघि बढिरहेको बताए । स्थानीयबासीले पनि विकासमा सहभागिता जनाउँदै साझेदारीको रुपमा काम गरिरहेका छन् । 'भरतपुर विकासको गतिमा छ, यसले अग्रगमन लिइरहेको छ,' उनले भने । (रासस)

सम्बन्धित खबरहरु