Nepalese Flag २०७७ फागुन १७ गते सोमबार   |   March 01, 2021

दुई करोड हिनामिनाको आरोपमा प्राविधिक सहायक निलम्बनमा

न्युज कारोबार हुम्ला फागुन २, २०७७       

दुई करोड हिनामिनाको आरोपमा प्राविधिक सहायक निलम्बनमा

हुम्लाको सर्केगाड गाउँपालिकाका प्रमुख प्रशासकीय अधिकृत दीपककुमार आचार्यले प्राविधिक सहायक (अधिकृत छैटौँ) रुद्रबहादुर शाहीलाई ९० दिनका लागि निलम्बन गरेका छन् । २०७७ साउनदेखि २०७७ कात्तिकसम्म गाउँपालिकामा अनुपस्थित रहेको र गत आर्थिक वर्षमा निमित्त प्रमुख प्रशासकीय अधिकृत हुँदा दुई करोड रुपैयाँबराबरको रकम अनियमितता गरेको भन्दै निलम्बन गरिएको हो ।

निलम्बन नगरेको खण्डमा सरकारी हानी‑नोक्सानी हुने र आफूविरुद्धको प्रमाण नष्ट गर्नेसक्ने भन्दै प्रशासकीय अधिकृत आचार्यले २०७७ माघ २९ गते बिहीबारदेखि लागू हुनेगरी निलम्बन गरेको बताएका छन् । आचार्यले कारबाही गर्नु नपर्ने कुनै कारण भए सात दिनभित्र आफूसमक्ष प्रमाण पेस गर्न र निलम्बन भएको मितिदेखि कार्यालयमा उपस्थित भई कुनै कार्य नगर्न जानकारी गराएका छन् ।

निमित्त प्रमुख प्रशासकीय अधिकृत शाहीले भने आफूले अनियमितता नगरेको बताएका छन् । यो सबै प्रक्रिया हालका अधिकृत आचार्यले मदिरा सेवन गरेर गाउँपालिकाको लेटरप्याडको दुरुपयोग गरेर आफ्नो मानहानी गरेको निमित्त अधिकृत शाहीले बताए । 'अहिले पनि प्रमुख प्रशासकीय अधिकृत आचार्यले दिएको नियुक्तिका अधारमा गाउँपालिकाका सम्पूर्ण काम गरिरहेको छु,' उनले भने । (रासस)

सम्बन्धित खबरहरु