काठमाडौं । केन्टन कुलले विश्वको सर्वोच्च शिखर सगरमाथा २०औँ पटक सफलतापूर्वक आरोहण गर्दै गैर-शेर्पा आरोहीतर्फ नयाँ इतिहास रचेका छन्।

५२ वर्षीय बेलायती पर्वतारोही कुल सगरमाथाको शिखरमा २० पटक पुग्ने पहिलो गैर–शेर्पा आरोही बनेका हुन्। यससँगै उनले गैर-शेर्पा आरोहीमध्ये सबैभन्दा धेरै पटक सगरमाथा आरोहण गर्ने आफ्नै कीर्तिमानलाई थप मजबुत बनाएका छन्।

उनले शुक्रबार, मे २२, २०२६ मा आफ्ना लामो समयदेखिका नेपाली गाइड दोर्जी ग्याल्जेन शेर्पासँगै बिहान करिब ४ बजे, सूर्योदयअघि सगरमाथाको चुचुरोमा पाइला टेकेका थिए।

कुलले पहिलो पटक सन् २००४ मा सगरमाथा आरोहण गरेका थिए। त्यसयता उनी लगभग हरेक वर्ष हिमाल फर्किँदै आएका छन् र विश्व पर्वतारोहण क्षेत्रमा निरन्तर सफल आरोहीका रूपमा परिचित छन्। यसअघि उनले सन् २०२५ मा १९औँ पटक आरोहण गरेर विदेशी आरोहीतर्फको कीर्तिमान बनाएका थिए।

यद्यपि गैर–शेर्पा आरोहीतर्फ कुलले नयाँ इतिहास रचे पनि सगरमाथा आरोहणको समग्र विश्व कीर्तिमान भने कामी रिता शेर्पाकै नाममा रहेको छ। उनले यसै सिजनमा ३२औँ पटक सगरमाथा आरोहण गर्दै आफ्नै विश्व कीर्तिमानलाई अझ उचाइमा पुर्‍याएका छन्।

आरोहणपछि प्रतिक्रिया दिँदै कुलले आफ्नो २०औँ सगरमाथा यात्रा “अत्यन्त विशेष उपलब्धि” भएको बताएका छन्। लामो अनुभव भए पनि सगरमाथा आरोहण कहिल्यै सामान्य अनुभव नहुने उनको भनाइ छ।

प्रकाशित समय : १९:२४ बजे