लियोनल मेसीको आगमनमा आयोजित कार्यक्रमस्थल साल्ट लेक स्टेडियममा भीड नियन्त्रणमा समस्या देखिएपछि अवस्था अराजक बनेको थियो । दर्शकहरूको अत्यधिक भीड र कमजोर सुरक्षा व्यवस्थाका कारण तनावको सिर्जना भएपछि मेसी कार्यक्रम सुरु भएको करिब २० मिनेटमै कोलकताको स्टेडियम छाड्न बाध्य भएका थिए ।

भीड उग्र बन्दै जाँदा केही दर्शकहरूले पानीका बोतल फ्याँकेका थिए भने ब्यानर र होर्डिङहरू पनि तोडफोड गरेका थिए । जसका कारण आतंकको स्थिति सिर्जना भएको थियो ।

स्थिति नियन्त्रण बाहिर जान थालेपछि सुरक्षाको कारण देखाउँदै सुरक्षा अधिकारीहरूले मेसीलाई तत्काल रंगशालाबाट बाहिर निकालेका थिए । स्थानीय सञ्चारमाध्यमका अनुसार, उनलाई सिधै विमानस्थल पु-याइएपछि हैदराबादतर्फ उडान गरिएको थियो ।

त्यसअघि अर्जेन्टिनी स्टार खेलाडी मेसीले बलिउड अभिनेता शाहरुख खानसहित अन्य विशिष्ट व्यक्तित्व तथा आयोजकहरूसँग भेटघाट गरेका थिए । उक्त घटनाप्रति पश्चिम बंगालकी मुख्यमन्त्री ममता बेनर्जीले गहिरो असन्तुष्टि व्यक्त गर्दै सार्वजनिक रूपमा माफी मागेकी छन् ।

प्रकाशित समय : ११:२० बजे