कोशी प्रदेशसभाको आजको बैठकमा ‘कोशी प्रदेश आमसञ्चार सम्बन्धमा व्यवस्था गर्न बनेको विधेयक’ सम्बन्धी प्रतिवेदन पेस भएको छ ।

न्याय, प्रशासन तथा विधायन समितिको सभापति कमला दर्नालले समितिको प्रतिवेदन सदनमा पेस गरेका हुन ।

विशेष समय र शून्य समयमा विविध विषयमा ध्यानाकर्षण

विशेष समय राष्ट्रिय प्रजातन्त्र पार्टी प्रदेशसभा संसदीय दलका नेता भक्तिप्रसाद सिटौलाले सन्दकपुरमा पर्यटक भित्राउन सरकारले आवश्यक संरचना बनाउनुपर्ने सुझाव दिए ।

समुन्द्र सतहबाट तीन हजार ३३६ मिटर उचाइमा रहेको सन्दकपुरलाई नेपाल सरकारले पहिलो पर्यटन गन्तव्यमा राखेको भन्दै उनले त्यसको विकासका लागि ध्यान दिनुपर्ने बताए । “जैविक विविधता, रेडपान्डा, ३८ जातका लालीगुराँस पाउनाका साथै जडीबुटी सङ्कलन केन्द्र पनि हो सन्दकपुर । त्यसैले भारतको पश्चिम बङ्गाल दार्जिलिङ र नेपालको इलामबाट जान सकिने त्यहाँको बाटो अत्यन्त खराब रहेकाले त्यसको विकासमा ध्यान दिऔँ”, सिटौलाले भने,“बाटो खराब भए पनि गएको वर्षमा भारत र बङ्गलादेशका तीन लाख ८० हजार नागरिक सन्दकपुरमा आएको तथ्याङ्क छ । त्यसको विकास भएमा लाखौँ पर्यटन भित्र्याउन सकिन्छ ।”

उनका अनुसार इलामबाट ३५ किमी दूरीमा रहेको सन्दकपुरको बाटो हालसम्म पाँच किलोमिटर मात्र कालोपत्र भएको छ । सन्दकपुरबाट नेपालका सबै शिखर हिमाल, भूटानको कालो पहाड अवलोकनका साथै बिहानको समयमा सूर्य देखिने भएकाले यस ठाउँलाई अलौकिक भन्ने गरिएको छ ।

सदस्य प्रेमराज थाम्सुङहाङले लिपुलेक र लिपियाधुरा नेपाली भूमि भएकाले नेपालको सहमतिबिना नै भारत र चीनले व्यापारिक मार्ग प्रयोग गर्न गरिएको सम्झौतामा सरकारले विरोध गर्नुपर्ने बताए । उनले यस्तो कार्यले नेपालको सार्वभौसत्ता, भौगोलिक अखण्डतामा आँच आउनाका साथै स्वाधीनतामा पनि प्रहार भएको धारणा राखे ।

प्रकाशित समय : १४:३६ बजे