काठमाडौं । छिमेकी देश भारतमा पछिल्लो ९ दिनमै कोरोना संक्रमणबाट ५८ जनाको मृत्यु भएको छ भने संक्रमितको संख्या ६ हजार नाघेको छ ।

भारतमा कोरोना भाइरसबाट पछिल्लो पटक ५८ जनाको मृत्यु भैसकेको अवस्थामा छिमेकी मुलुक नेपाल उच्च जोखिममा परेको छ । भारतमा कोरोना संक्रमितको संख्या दिनानुदिन बढ्दै गएको हो ।

पछिल्लो ९ दिनमा ३ हजार ४२३ नयाँ संक्रमित थपिनुका साथै ५८ जनाको मृत्यु भएको भारतको स्वास्थ्य विभागले जनाएको छ । मे ३० सम्म सक्रिय संक्रमित २ हजार ७१० मात्र थियो भने मृत्यु हुनेको संख्या ७ रहेको थियो । हाल दैनिक ४०० नयाँ संक्रमित र औषतमा ५–६ जनाको मृत्यु हुने गरेको भारतीय अधिकारीहरुले बताएका छन् ।

केरलामा सबैभन्दा बढी संक्रमित फेला परेका छन् भने भारतमा चार नयाँ भेरियन्टहरू पत्ता लागेका छन् । भारतबाट नेपाल आएका कतिपय मानिसहरुमा कोरोना पुष्टि भएको छ ।

बाँकी जोखिम कम गर्नका लागि सर्तकताको पूर्व तयारी अपनाइरहेको स्वास्थ्य तथा जनसंख्या मन्त्रालयले जनाएको छ । स्वास्थ्य तथा जनसङ्ख्या मन्त्रालय प्रवक्ता डाक्टर प्रकाश बुढाथोकीले भारतमा पछिल्लो समय तीव्र रूपमा फैलिएको सङ्क्रमण र केही मृत्युका घटनालाई मध्यनजर गरेर विगत दुई सातादेखि पूर्व तयारी भइरहेको जानकारी दिए ।

प्रकाशित समय : १२:१६ बजे