रौतहट । रौतहटको चन्द्रपुर नगरपालिका क्षेत्रमा रहेका तीन विद्यालयको तह घटाउने र एकलाई अर्कोमा गाभ्ने निर्णय भएको छ । चन्द्रपुर नगरपालिकाको नगर शिक्षा समितिको हालै बसेको बैठकले सो निर्णय गरेको हो ।

चन्द्रपुर नगरपालिका शिक्षा शाखा प्रमुख दिपेन्द्र मण्डलका अनुसार निम्न माध्यमिक विद्यालय चन्द्रपुर–२ असनवा ,बसन्त आधारभूत विद्यालय बसन्तपुर र जनता प्राथमिक विद्यालय बडहरवालाई तह घटाउने निर्णय भएको हो । नयाँ शैक्षिक सत्रको लागि तिन विद्यालयलाई कक्षा १ देखि कक्षा ३ सम्म अध्यापनको अनुमति दिने निर्णय गरेको उनले जानकारी दिए ।

यस अघि सो विद्यालयहरुमा कक्षा ५ देखि ७ सम्म अध्यापन हुने गरेको थियो । जनप्रिय प्राथमिक विद्यालय नयाँटोल पडहरियालाई श्री कृष्ण माध्यमिक विद्यालयमा गाभ्ने निर्णय शिक्षा समितिको बैठकले गरेको शिक्षा शाखा प्रमुख मण्डलले जानकारी दिए । यी विद्यालयहरुमा विद्यार्थी संख्या न्यून हुँदै गएपछि यो निर्णय गरिएको उनले उल्लेख गरेका छन ।

अर्को तर्फ यस विद्यालयहरुमा विद्यार्थीको संख्या न्यून र शिक्षकको संख्या अवश्यकता भन्दा बढी रहेको पाइएको उनको भनाइ छ । अब तह घटाउने र गाभ्ने निर्णयसँगै शिक्षकको संख्यामा पनि कटौती हुने उनले बताए । ‘जहाँ विद्यार्थी त्यहाँ शिक्षक भन्ने मान्यताका साथ अघि बढेका छौ’ उनले भने ।

अनावश्यक शिक्षक दरबन्दी रहेको पाइएपछि व्यवस्थापनको लागि यस्तो निर्णय गर्नु परेको चन्द्रपुर नगरपालिकाको नगर शिक्षा समितिले जनाएको छ । तर नगर क्षेत्रमा रहेका विद्यालयले पाठयपुस्तक वितरणसँगै नयाँ शैक्षिक सत्रका लागि अध्यापन सुरु गरिसकेका छन ।

प्रकाशित समय : १६:३५ बजे