नेपाल–चीन दौत्य सम्बन्ध स्थापना भएको ७० औँ वर्ष पुगेको सन्दर्भमा सांस्कृतिक तथा पर्यटकीय आदानप्रदान गर्ने उद्देश्यले आज यहाँ विविध कार्यक्रम आयोजना गरिएको छ ।

चाइना सेन्टर फर इन्टरनेशनल कम्युनिकेशन डेभलपमेन्ट, ग्वान्जाओ कल्चर र रेष्टुरेन्ट ग्रुपद्वारा आयोजित ‘ग्वान्जाओ सहर प्रवर्द्धन’ कार्यक्रममा तस्वीर प्रदर्शन तथा सांस्कृतिक प्रस्तुति प्रस्तुत गरिएको थियो ।

कार्यक्रममा ग्वान्जाओ सरहका विभिन्न पक्ष समेटिएका ५० बढी तस्वीर प्रदर्शनका साथै ग्वान्जाओ सांस्कृतिक समूहले विभिन्न प्रस्तुति दिएको थियो । यस्तै ग्वान्जाओ रेष्टुरेन्ट ग्रुपकातर्फबाट स्थानीय खानाका विभिन्न परिकार प्रस्तुत गरिएको थियो ।

सो अवसरमा संस्कृति, पर्यटन तथा नागरिक उड्डयन मन्त्रालयका सचिव विनोदप्रकाश सिंहले दुई देशका बीचमा हुने सांस्कृतिक आदानप्रदानबाट पर्यटन प्रवद्र्धनमा टेवा पुग्ने विश्वास व्यक्त गरे । काठमाडौँस्थित चिनियाँ दूतावासका डेपुटी चिफ अफ मिसन वाङ सीनले आर्थिक तथा व्यापारिक, शिक्षा, पर्यटनलगायत क्षेत्रमा ग्वान्जाउ र काठमाडौँबीच विशेष सम्बन्ध रहीआएको बताए ।

प्रकाशित समय : २२:३० बजे