म्याग्दीको मालिका गाउँपालिकाको केन्द्र दरवाङमा मङ्लबारदेखि एक लाख ५० हजार पुरस्कार राशिको दोस्रो ‘जेपिसी’ कप फुटबल प्रतियोगिता सुरु भएको छ ।

दरवाङमा रहेको जनप्रिय माविको भूतपूर्व विद्यार्थी क्लबले नव वर्ष २०८२ को अवसरमा आयोजना गरेको प्रतियोगिताको मालिका गाउँपालिकाका अध्यक्ष बेगप्रसाद गर्बुजाले उद्घाटन गरे।

वैशाख ६ गतेसम्म सञ्चालन हुने प्रतियोगितामा २५ समूहले सहभागिता जनाएका क्लबका अध्यक्ष कुशल घर्तीले जानकारी दिए । उद्घाटन खेलमा मालिका गाउँपालिका–५ रुम्माले आयोजकको ‘सि’ समूहलाई शून्यका विरुद्ध तीन गोलले पराजित गरेको छ ।

पहिलो दिनको दोस्रो खेलमा बेनी नगरपालिका–४ तातोपानीले मालिका गाउँपालिका–५ पन्थोकलाई शून्यका विरुद्ध एक र तेस्रो खेलमा आयोजकको ‘डि’ समूहलाई मालिका गाउँपालिका–१ निस्कोट बेशीले एक का विरुद्ध ११ गोल गर्दै दोस्रो चरणमा प्रवेश गरेका छन् ।

प्रतियोगिताको विजेता र उपविजेतालाई ट्रफी, मेडल र प्रमाणपत्रसहित एक लाख ५० हजार र ८० हजार प्रदान गरिने क्लबले जनाएको छ । अनुशासित र सेमीफाइनलबाट बाहिरिने टिमलाई १०/१० हजार, उत्कृष्ट खेलाडीलाई छ हजार, उत्कृष्ट गोलरक्षक, डिफेन्डर र सर्वाधिक गोलकर्तालाई पाँच/पाँच हजार पुरस्कार प्रदान गरिने क्लबले जनाएको छ ।

प्रकाशित समय : २२:१८ बजे