नेपाल कम्युनिष्ट पार्टी (एमाले) का उपाध्यक्ष युवराज ज्ञवालीले देशमा आर्थिक, समाजिक र सांस्कृतिक परिवर्तनका लागि जागरुक हुन जरुरी रहेको बताएका छन ।

सो पार्टीले आज धनगढीमा गरेको जागरणसभामा उनले अहिलेसम्म देशमा राजनीतिक परिवर्तन भए पनि आर्थिक, सामाजिक परिवर्तन हुन नसकेकोे बताए । प्रतिगामी शक्तिले फेरि लोकतन्त्र मास्न चाहिरहेको उल्लेख गर्दै उनले भने, “नेपाली जनताले प्रगति र उन्नति चाहेका छन्, राजा फर्काउन चाहेका छैनन् ।”

उनले भ्रष्टाचार, गरिबी, पछ्यौटेपनलाई अन्त्य गरी न्यायपूर्ण र समतामूलक समाज निर्माणमा पार्टी लागेको बताए । सो पार्टीका महासचिव शङ्कर पोखरेलले अहिले देशमा अराजकता र अस्थिरताको समस्या रहेकोले यस्ता तत्वविरुद्ध सचेत र जागरुक हुनुपर्ने बेला आएको बताए ।

राजनीतिक अस्थिरताकै कारण देशमा अपेक्षित काम अघि बढ्न नसकेको बताउँदै उनले भने, “हरेक जनता राष्ट्रको पक्षमा बोल्न सक्नुपर्छ ।” मुलुक सङ्कटमा परेको बेला देशका दुई ठूला दल नेपाली कांग्रेस र नेकपा एमालेले मिलेर सङ्कटको सामना गरेको इतिहास रहेको चर्चा गर्दै उनले अहिले देखिएको अस्थिरता र सङ्कटको समाधानका लागि दुई ठूला पार्टीको सरकार बनेको भनाइ राखे ।

उनले थपे, “ठूला पार्टीमाथि साना दलले शासन गर्ने परम्परा अन्त्य गर्नका लागि ठूला दल मिलेर सरकार गठन गरेका हौँ ।” अहिलेको लोकतान्त्रिक व्यवस्थाकै कारण खानेपानी, बिजुली, स्वास्थ्य, शिक्षा, सडक पूर्वाधार लगायत क्षेत्रको विकासमा ठूलो सुधार भएको उनको भनाइ थियो । उनले भने, “लोकतन्त्रले केही दिन सकेको छैन भन्ने आरोप गलत छ, पञ्चायतकालभन्दा लोकतन्त्रान्त्रिक व्यवस्थामा समाज बदलिएको छ, यो व्यवस्थाका कमीकजोरी सुधारेर थप उत्कृष्ट बनाउने प्रयास गर्न चाहन्छौँँ ।”

सभामा एमालेका सचिव लेखराज भट्ट, कर्णबहादुर थापा, दामोदर भण्डारी, निरुपाल, नारदमुनी राना थारुलगायतले समसामयिक राजनीतिका विषयमा चर्चा गरेका थिए ।

प्रकाशित समय : २१:११ बजे