नेपाली कांग्रेसका नेता एवम् पूर्व स्वास्थ्य सहायकमन्त्री डा. रामचन्द्र अधिकारीद्वारा लिखित ‘मेरो जीवन यात्रा’ विमोचन गरिएको छ ।

जीवनका भोगाईलाई समेटेर लेख्नुभएको पुस्तक उनको सहस्र १००८ पूर्ण चन्द्रदर्शन (चौरासी पुजा)का अवसरमा आज कांग्रेस सभापति एवम् पूर्वप्रधानमन्त्री शेरबहादुर देउवाले विमोचन गरे । सभापति देउवाले राजनीतिमार्फत समाजसेवाको क्षेत्रमा डा. अधिकारीले पु-याएको योगदान महत्त्वपूर्ण रहेको बताए । पूर्वप्रधानमन्त्री देउवाले प्रजातन्त्र स्थापनाका लागि डा. अधिकारीले गरेको सङ्घर्ष अनुकरणीय रहेको बताए ।

“हामी प्रजातन्त्र र लोकतन्त्रका लागि सँगसँगै राजनीतिमा लागेका हौँ, ८४ वर्षे जीवन दोस्रो पुस्ताको लागि मार्गदर्शन बन्न सक्छ,” उनले भने । डा. अधिकारीले चालेको हरेक अभियान सफल भएको सभापति देउवाको भनाई थियो ।

पुस्तकका लेखक डा. अधिकारीले आफ्नो महत्त्वपूर्ण जीवन राजनीति र समाजसेवामा व्यतित गरेको बताए । आफ्नो जीवनकथा दोस्रो पुस्ताका लागि प्रेरणाको स्रोत बन्ने उल्लेख गरे । पुस्तकबारे साहित्यकार विजयराज न्यौपानेले टिप्पणी गरेको थियो ।

नेपाली कांग्रेस लमजुङको महाधिवेशन प्रतिनिधी, महासमिति सदस्य, जिल्ला सभापति भएका डा अधिकारी विसं २०४८ र २०५१ को आम निर्वाचनमा लमजुङ क्षेत्र नं १ बाट निर्वाचित भई स्वास्थ्य सहायकमन्त्री बनेको थियो ।

प्रकाशित समय : २०:२२ बजे