नेपाल प्रिमियर लिग (एनपीएल) को तयारीमा रहेको विराटनगर किंग्स पोखरा एभेन्जर्ससँग पराजित भएको छ । मुलपानी क्रिकेट मैदानमा भएको अभ्यास खेलमा विराटनगर पोखरासँग ३६ रनले पराजित भएको हो ।

टस जितेर पहिले ब्याटिङ गरेको पोखरा एभेन्जर्सले निर्धारित २० ओभरमा ८ विकेट गुमाएर १ सय ६० रन बनाएको थियो । पोखराका लागि कुशल भुर्तेलले ३५ बलमा सर्वाधिक ५५ रन जोडे । अन्य खेलाडीको प्रदर्शन भने औसत रह्यो । पोखराका लागि दिनेश खरेलले १६ रन बनाउँदा विदेशी खेलाडी बास डि लिड्सले १९ रन बनाए । त्यस्तै, माइकल लिस्कले २१ रन बनाउँदा किरण ठगुन्नाले १० रनको योगदान दिए ।

विराटनगरका लागि सन्दीप लामिछाने र सुवास भण्डारीले २-२ तथा जितेन्द्र मुखिया, प्रतिश जिसी र राजेश पुलामीले समान १-१ विकेट लिए ।

विदेशी खेलाडीबिना मैदानमा ब्याटिङका लागि उत्रिएको विराटनगर गतिलो ब्याटिङ गर्न सकेन । विराटनगर निर्धारित २० ओभरमा ८ विकेट गुमाएर १ सय २४ रनमा समेटिएको थियो । उसका लागि फिर्दोस अन्सारी २१ रनमा अविजित रहँदा दीपक बोहराले १९ र बसिर अहमदले १८ रन जोडेका थिए ।

पोखराका लागि सागर ढकाल र तीर्थ राज दासले २-२ विकेट लिए । शनिबारदेखि सुरु हुने एनपीएलको उद्घाटन खेलमा विराटनगरले जनकपुर बोल्ट्सको सामना गर्दै छ ।

प्रकाशित समय : १८:५६ बजे