nmb bank

गृहपृष्ठ प्राकृतिक विपद्मा परेकालाई उद्धार, राहतको प्रबन्ध गर्न माग

प्राकृतिक विपद्मा परेकालाई उद्धार, राहतको प्रबन्ध गर्न माग

प्राकृतिक विपद्मा परेकालाई उद्धार, राहतको प्रबन्ध गर्न माग

प्रतिनिधिसभाको आजको बैठकमा सांसदहरुले प्राकृतिक विपद्का कारण समस्यामा परेका नागरिकलाई तत्काल राहतको प्रबन्ध गर्न सरकारको ध्यानाकर्षण गराएका छन् ।

प्रतिनिधिसभाको विशेष समयमा बोल्ने अधिकांश सांसदले जनताका समस्या समाधानमा केन्द्रित हुनुपर्ने राजनीतिक दलहरु सरकार परिवर्तनमा मात्रै केन्द्रित हुँदा निराशा बढेको बताए ।

सांसद रोशन कार्कीले अनियमितता नियन्त्रणको विषयलाई ‘बार्गेनिङ’को साधन नबनाउन आग्रह गरे । उनले विपद् प्रभावितलाई राहतको प्रबन्ध गर्न सरकारको ध्यानाकर्षण गराए ।

सांसद अमरबहादुर थापाले छोटो समयमा सरकार परिवर्तन गर्ने, एकलेअर्कोलाई घोचपेच गर्ने प्रवृत्तिप्रति चिन्ता व्यक्त गरे । मुलुकलाई आर्थिक समृद्धिको दिशामा अगाडि बढाउनेतर्फ लाग्नुपर्नेमा सरकार परिवर्तनको सोच गलत भएको धारणा व्यक्त गरे ।

सांसद सुशीला श्रेष्ठले उदयपुरलगायत देशभर बाढीपहिराका कारण प्रभावित नागरिकको व्यवस्थापनका लागि सरकारको ध्यानाकर्षण गराए । जलवायु परिवर्तनको असर निरन्तरको वर्षामा देखिएको उल्लेख गर्दै उनले सुरक्षित बस्ती निर्माणमा ध्यान दिनुपर्नेमा जोड दिए ।

सांसद अब्दुल खानले सरकार परिवर्तनका सम्बन्धमा जोडिएका संविधानका धारामा पटकपटक चर्चा भए पनि मौलिक हक र कर्तव्यका बारेमा कहिल्यै चर्चा नभएको गुनासो गरे । उनले मुद्रास्फीति घटाउनेतर्फ विशेष ध्यान दिन, आर्थिक असमानता घटाउने उपायाको खोजी गर्न आवश्यक भएको बताए ।

सांसद रामप्रकाश चौधरीले सुन तस्करीका आरोपीलाई सजाय छुट दिइएकामा आपत्ति जनाए ।

सांसद प्रभु साहले हुण्डी कारोबारका कारण मुलुक तहसनहस भएको, भ्रष्टाचार मौलाएको, अपराधका घटनामा वृद्धि भएको, लागुऔषधको कारोबारसमेत वृद्धि भएको पाइएकाले त्यसलाई नियन्त्रण गर्न माग गर्नुभयो । उच्च सरकारी ओहोदा तथा राजनीतिक नेतृत्वमा रहेका पनि हुण्डी कारोबारमा संलग्न पाइए पनि तिनलाई कारबाही गर्नेतर्फ ध्यान नदिइएको उनले टिप्पणी गरे ।

सांसद कुसुमदेवी थापाले बाढीपहिरामा परी ज्यान गुमाउनेहरुप्रति श्रद्धाञ्जली व्यक्त गर्दै प्रभाािवतलाई उद्धार र राहतको प्रबन्ध गर्न माग गरिन ।

सांसद मनबहादुर गुरुङले पनि मनसुनजन्य विपद्का कारण जनधनको क्षति भएको प्रसङ्ग उठाउँदै प्रभावितलाई राहत सामग्रीको प्रबन्ध गर्ने दायित्व सरकारको हो भने ।

सांसद प्रेम सुवालले नेपाली कांग्रेस र नेकपा(एमाले)का बीचमा भएको भनिएको सहमति आम जनतालाई जानकारी दिन आग्रह गरे ।

सांसद राजेन्द्र बजगाईले मनसुनका कारण गोरखाका विभिन्न क्षेत्रका पुलपुलेसा बगाएको, जनजीवन प्रभावित भएको, भूक्षय भएको जानकारी दिँदै समस्या समाधानका लागि सरकारको ध्यानाकर्षण गराए । उनले बस्ती स्थानान्तरण र एकीकृत बस्ती बसाउने सन्दर्भमा ध्यान दिन नसकिएकाले समस्या बल्झँदै गएको बताए ।

 

प्रकाशित समय : १४:३७ बजे

प्रतिक्रिया दिनुहोस्

सम्बन्धित शीर्षकहरु