nmb bank

गृहपृष्ठ सिरिया आक्रमणको जवाफबाट इजराइल आतङ्कित भएको छ– इरान

सिरिया आक्रमणको जवाफबाट इजराइल आतङ्कित भएको छ– इरान

सिरिया आक्रमणको जवाफबाट इजराइल आतङ्कित भएको छ– इरान

सिरियामा भएको हमलामा आफ्नो रिभोल्युसनरी गार्डका सदस्यहरू मारिएपछि इरानका तर्फबाट सम्भावित प्रतिशोधको प्रतिक्रियाले इजराइल आतङ्कित बनेको इरानका सर्वोच्च नेताका एक सल्लाहकारले शनिबार बताएका छन् ।

“यहुदीहरू पूर्णरूपमा आतङ्कित बनेको र सतर्क अवस्थामा रहेको एक साता भएको छ”, सर्वोच्च नेता आयातुल्लाह अली खमेनीका वरिष्ठ सल्लाहकार याह्या रहिम सफवीको भनाइ उद्धृत गर्दै आइएसएनएले भनेको छ, “इरानले के गर्न खोजेको छ भन्नेबारे उनीहरूलाई थाहा छैन, त्यसैले उनीहरू र उनीहरूका समर्थक भयभीत भएका छन् ।”

इरानले अप्रिल १ मा दुई जनरलसहित इस्लामिक रिभोल्युसनरी गार्डका सात सदस्यको मृत्यु हुनेगरी सिरियाको राजधानी दमास्कसमा वाणिज्य दूतावासको भवन ध्वस्त पार्ने हमलाका लागि इजराइललाई दोष दिँदै हमलाको बदला लिने वाचा गरेको छ ।

यस घटनामा कुनै टिप्पणी नगरेको इजराइलले हमलापछि आफ्ना सेनाले बिदा निलम्बनको घोषणा गरेको बताएको छ । अधिकारीहरूले हवाई सुरक्षा सञ्चालन गर्नका लागि जनशक्ति बढाउन र जगेडा सैनिकहरू तयार गर्ने फैसला गरेको सेनाले बताएको छ ।

सफवीले भन्नुभयो, “यो मनोवैज्ञानिक सञ्चारमाध्यम र राजनीतिक युद्धका लागि युद्धभन्दा पनि भयानक छ किनकी इजराइल प्रत्येक रात हमलाको प्रतीक्षा गरिरहेको छ, तीमध्ये धेरै भागेका छन् र आश्रयमा गएका छन् ।”

बेलायतस्थित युद्ध निगरानीकर्ता सिरियन अब्जरभेटरी फर ह्युमन राइट्सले अप्रिल १ मा भएको हमलामा १६ जना मारिएको बताएको छ । मृतकहरूमा जनरल मोहम्मद रजा जाहेदी र मोहम्मद हाजी हाजी रहिमी पनि थिए । उनीहरू आइआरजिसीका विदेशी अपरेसन शाखा कुद्स फोर्सका वरिष्ठ कमान्डर थिए ।

सन् २०२० मा बगदाद विमानस्थलमा अमेरिकाको मिसाइल हमलामा कुद्स फोर्सका प्रमुख जनरल कासिम सुलेमानी मारिएपछि मारिएका ६३ वर्षीय जाहेदी सबैभन्दा वरिष्ठ इरानी सैनिक थिए ।

दमास्कसमा भएको हमला गाजा युद्धको पृष्ठभूमिमा भएको थियो । अक्टोबर ७ मा इजराइलमाथि हमासबाट सुरु भएको हमलामा अधिकांश सर्वसाधारणसहित एक हजार एक सय ७० जनाको ज्यान गएको थियो ।

तेहरानले हमासलाई समर्थन गर्दछ तर उसले हमलामा कुनै पनि प्रत्यक्ष संलग्नतालाई अस्वीकार गरेको छ । हमासको हमलापछि गाजा क्षेत्रमा हमासविरुद्ध ठूलो मात्रामा इजराइली जवाफी कारवाहीलाई जन्म दिएको छ । इरानले इजराइललाई मान्यता दिँदैन र दुवै मुलुकले वर्षौंसम्म छायाँ युद्ध लडेका छन् ।

इरानले इजराइलमाथि उसको आणविक कार्यक्रमलाई निशाना बनाउँदै तोडफोड र हत्याहरूको शृङ्खला चलाएको आरोप लगाएको छ ।

प्रकाशित समय : २१:१० बजे

प्रतिक्रिया दिनुहोस्

सम्बन्धित शीर्षकहरु