nmb bank

गृहपृष्ठ चितवन राष्ट्रिय निकुञ्जमा जिप सफारीको राजस्व भुक्तानी अब अनलाइनबाटै गरिने

चितवन राष्ट्रिय निकुञ्जमा जिप सफारीको राजस्व भुक्तानी अब अनलाइनबाटै गरिने

चितवन राष्ट्रिय निकुञ्जमा जिप सफारीको राजस्व भुक्तानी अब अनलाइनबाटै गरिने

चितवन राष्ट्रिय निकुञ्ज घुम्न जाने पर्यटकहरुका लागि जिप ब्यवसायीले अब लामो लाइन बसेर पर्यटक र सवारीको राजस्व तिर्ने झन्झट बेहोर्नु नपर्ने भएको छ । चितवन राष्ट्रिय निकुञ्जले निकुञ्ज प्रवेशका लागि कागजी टिकटको साटो अनलाइनबाटै टिकट काट्ने व्यवस्था गर्न लागेको हो ।

निकुञ्जका प्रवक्ता गणेश तिवारीका अनुसार निकुञ्जले अनलाइनबाटै राजस्व तिर्ने व्यवस्थाका लागि राष्ट्रिय निकुञ्ज तथा वन्यजन्तु संरक्षण विभागसँग छलफल सुरु गरेको छ ।

“अनलाइनबाट राजस्व तिर्ने व्यवस्थाका लागि विभाग र विभिन्न वालेट सञ्चालकहरुसँग छलफल सुरु गरेका छौँ”, उनले भने, “अहिले प्रारम्भिक छलफल सुरु गरेका छौँ ।” विभागले यसअघि शिवपुरी र नागार्जुनमा अनलाइनबाट  भुक्तानी गर्ने व्यवस्था गरिसकेको छ ।

उनका अनुसार हाल चितवन राष्ट्रिय निकुञ्जमा वार्षिक तीन लाखभन्दा बढी पर्यटकले अवलोकन गर्ने गरेका छन् । जसमध्ये विशेष गरी सौराह, कसरा, मेगौली, वनकट्टा र अमलटारीलगायतका स्थानबाट टिकट काट्ने व्यवस्था छ ।

“सौराह र कसरालगायतका स्थानमा राजस्व तिर्न लामो लाइन लाग्नुपर्ने अवस्था छ । यो अवस्था अन्त्य गर्नका लागि पनि अनलाइनबाट भुक्तानी गर्ने व्यवस्था हुनु जरुरी छ”, उनले भने, “कागजको खर्च पनि बचत हुने र पर्यटकका लागि पनि सहज हुने भएकाले सो व्यवस्था गर्न लागिएको हो ।” उनका अनुसार हाल सौराहमा राजस्व बुझ्नकै लागि दरबन्दीभन्दा बढी कर्मचारी खटाइएको छ ।

यद्यपि पर्यटकले व्यक्तिगत रुपमा भन्दा पनि होटल तथा जिप व्यवसायीहरुले सामुहिक रुपमा भुक्तानी गर्ने गरेका छन् । “चितवनमा पर्यटकहरुले व्यक्तिगत रुपमाभन्दा पनि होटल व्यवसायी र जिप सफारी सञ्चालकले कागजपत्र ल्याएर सामूहिक रुपमा भुक्तानी गर्ने गरेका छन् । उनीहरुलाई अनलाइनबाट भुक्तानी गर्दा धेरै सहज हुने अपेक्षा गरेका छौँ”, उनले भने ।

हाल चितवन राष्ट्रिय निकुञ्ज प्रवेशका लागि नेपाली नागरिकलाई रु एक सय ५०, सार्क राष्ट्रका नागरिकलाई रु एक हजार र विदेशी पर्यटकलाई प्रतिव्यक्ति रु दुई हजार लाग्छ । साथै जित सफारीका लागि प्रतिजिप रु पाँच हजार शुल्क तोकिएको छ ।

देशभरका कुल राष्ट्रिय निकुञ्जमध्ये चितवनमा सबैभन्दा बढी पर्यटक आउने गरेका छन् । यस निकुञ्जले गत आर्थिक वर्षमा मात्रै रु ३० करोड राजस्व सङ्कलन गरेको थियो ।

प्रकाशित समय : ११:२३ बजे

प्रतिक्रिया दिनुहोस्

सम्बन्धित शीर्षकहरु