nmb bank

गृहपृष्ठ गण्डकीका यातायात कार्यालयबाट ५६ करोड राजस्व संकलन

गण्डकीका यातायात कार्यालयबाट ५६ करोड राजस्व संकलन

गण्डकीका यातायात कार्यालयबाट ५६ करोड राजस्व संकलन

गण्डकी प्रदेशका यातायात कार्यालयले चालु आर्थिक वर्ष २०८०-८१ को साढे चार महिनाको अवधिमा रु ५६ करोडभन्दा बढी राजस्व संकलन गरेका छन् । चालु आर्थिक वर्षको साउनदेखि मङ्सिर १५ गतेसम्म ५६ करोड ८४ करोड ८४ लाख ८६ हजार तीन सय ४९ राजस्व संकलन भएको मन्त्रालयले जनाएको छ ।

बाग्लुङ, डुम्रे र नवलपुरमा एक-एक र कास्कीमा दुईवटा यातायात कार्यालय, गोरखा, लमजुङ र स्याङ्जामा यातायात सेवा कार्यालयले सो राजस्व संकलन गरेका हुन् ।

मन्त्रालयका सचिव शंकरप्रसाद पण्डितका अनुसार सबैभन्दा बढी यातायात व्यवस्था कार्यालय सवारी कास्कीले रु ३१ करोड ७१ लाख ३५ हजार सात सय ८१ राजस्व संकलन गरेको छ । यातायात व्यवस्था कार्यालय सवारी चालक अनुमतिपत्र, कास्कीले रु छ करोड ४७ लाख ३९ हजार नौ सय २६, बाग्लुङले रु चार करोड १० लाख ३२ हजार ६ सय ७०, नवलपुरबाट रु छ करोड ३४ लाख ७९ हजार ६ सय ७४, डुम्रेबाट रु चार करोड १० लाख ९१ हजार एक सय ७५ राजस्व संकलन भएको छ ।

गोरखा, लमजुङ र स्याङ्जाको यातायात सेवा शाखाबाट एकमुष्ट रु चार करोड १० लाख सात हजार एक सय २३ राजस्व संकलन भएको मन्त्रालयले जनाएको छ । सवारी चालक अनुमतिपत्र जारी, नवीकरण, सवारीसाधन दर्ता, नवीकरण र जरिवानालगायत शीर्षकमा राजस्व संकलन भएको हो ।

आर्थिक वर्ष २०७८-७९ मा रु दुई अर्ब २४ करोड र २०७९-८० मा रु तीन अर्ब १७ करोड राजस्व संकलन गरेका यातायात कार्यालयहरूले चालु आर्थिक वर्षको पहिलो चौमासिकमा लक्ष्यअनुुसार नै राजस्व संकलन गरेका मन्त्रालयको यातायात व्यवस्था महाशाखा प्रमुख समेत रहेका प्रवक्ता टीकाराम पौडेलले बताएका छन् ।

प्रदेश सरकारले चालु आर्थिक वर्षको पहिलो चौमासिकमा एक अर्ब १५ करोड राजस्व संकलन गरेकामा यातायात कार्यालयहरूको योगदान करिब आधा रहेको छ । भौतिक पूर्वाधार विकास तथा यातायात व्यवस्थामन्त्री रेशमबहादुर जुग्जालीले यातायात कार्यालयहरूको सेवालाई सरलीकरण, झन्झटरहित, सहज र प्रविधिमैत्री बनाउन जोड दिएको बताए ।

चालु आर्थिक वर्ष सुरु भएयता पोखरा उपत्यकाभित्र चल्ने ट्याक्सीमा मिटर प्रणाली लागू गर्न विसं २०७७ मा भएको निर्णय कार्यान्वयन गरिएको र बागलुङमा ११ वर्षपछि पुनः चारपाङ्ग्रे सवारी चालक अनुमतिपत्रको प्रयोगात्मक परीक्षा सञ्चालन गरिएको मन्त्री जुग्जालीले बताए ।

सवारी साधन दर्ता र नवीकरणसम्बन्धी सेवा दिने हाम्रो कार्यालयमा फाइललाई डिजिटलाइजेसन गरेर लाइन बस्न र बिचौलियाको सहयोग लिन नपर्ने बनाइएको यातायात व्यवस्था कार्यालय कास्की सवारीका प्रमुख डिल्लीराम रिजालले बताए ।

सेवाग्राहीको अत्यधिक चाप र भीड हुने भएकाले बिहान ८ बजेदेखि नै सवारी चालक अनुमतिपत्रको ट्रायल परीक्षा सञ्चालन गर्न र सवारी चालक अनुमतिपत्रको राजस्व अनलाइनमार्फत बुझाउने व्यवस्था मिलाइएको यातायात व्यवस्था कार्यालय सवारी चालक अनुमतिपत्र कास्कीका प्रमुख जितेन्द्रजङ्ग केसीले बताएका छन् ।

दरबन्दी अनुसारका कर्मचारीको अभाव, करारका कर्मचारीको भरमा कार्यालय सञ्चालन गर्नुपर्ने, संघीय सरकार मातहतको सर्भरमा पटकपटक आइरहने समस्याका कारणले सेवाप्रवाहमा चुनौती रहेको यातायात कार्यालयका प्रमुखहरुले बताएका छन् ।

प्रकाशित समय : १९:५५ बजे

प्रतिक्रिया दिनुहोस्

सम्बन्धित शीर्षकहरु