गत कात्तिक २६ गते राति मोरङको उर्लाबारीमा एक असाधारण घट्ना घट्यो । जसबाट २७ जना एकै आगोको लप्कामा जलेर घाइते भए । त्यसमध्ये पनि ८ जनाको अवस्था निकै चिन्ताजनक छ ।

गत आइतबार राति मोरङको उर्लाबारी–७ बारगाछीमा रहेको स्नेहा ज्वलर्स नामको सुन पसलबाट धुँवाको मुस्लो निस्कियो । स्थानीयहरु आत्तिएर भागदौड गर्न थाले । गस्तीमा रहेको प्रहरीको भ्यान पनि पुग्यो । स्थानीय दीपक कार्कीको घरमा रहेको सुन पसलमा आगलागी भएर धुँवाको मुस्लो निस्किएपछि घरभित्र भएका मानिसलाई बचाउन र आगो नियन्त्रण गर्न चारजना प्रहरी र स्थानीयको टोली जुट्यो । तर सटर खोल्न नपाउँदै भयंकर विस्फोट हुन पुग्यो । जसले चार प्रहरीसहित २३ जना स्थानीय एकै लप्कामा जलेर घाइते भए । आखिर यस्तो भयंकर विस्फोट कसरी हुन पुग्यो त ? बर्न अस्पताल कीर्तिपुरमा उपचार गराईरहेका प्रहरी सहायक निरीक्षक चुडामणि प्रधान भन्छन्, ‘सटरभित्र कार, केही ग्यास सिलिण्डर र सोलारका ब्याट्री पनि रहेछन् । सटर खोल्नवित्तिकै सबै एकैपटक विस्फोट भए ।’

प्रहरी सहायक निरीक्षक प्रधानसहित स्थानीयको टोली समयमै दमकल नआएपछि उद्दार र आगो नियन्त्रणका लागि जुटेको थियो । तर उद्दारमा खटिएका उनीहरु नै अहिले जलेर पुरै छटपटीको अवस्थामा छन् । किनकि विद्युत सट भएर आगलागी भएको अनुमान गरिएपनि त्यहाँ रहेका ग्यास सिलिण्डर, कार र ब्याट्री एकैपटक विस्फोट भएको घाइतेका आफन्तीहरु बताउँछन् ।

विस्फोट भएर एकैपटक २७ जना घाइते भएपछि आधाभन्दा धेरैलाई उपचारका लागि झापाको बिएनसी लगियो । अन्यलाई विराटनगर लगायतका केही अस्पतालमा भर्ना गरियो । तर बिएनसीमा भर्ना भएका विरामी निकै क्रिटिकल अवस्थाका थिए । यो अस्पतालले घाइतेको अवस्थालाई सामान्य ढंगले लिएपछि आफन्तीहरु आत्तिन थाले । घाइतेहरु झनझन सिकिस्त हुन थालेपछि उनीहरुले काठमाडौंको बर्न अस्पताल लिन खोजे । तर पैसा नबुझाई बिरामी नपठाउने भन्दै अस्पतालले अड्डी कसेपछि कोशी प्रदेशका मुख्यमन्त्री केदार कार्कीले हस्तक्षेप नै गर्नुपर्‍यो । यो अस्पतालका सञ्चालक आफुलाई अभियन्ता भनेर चिनाइरहेका मेडिकल व्यवसायी दुर्गा प्रसाईं हुन् । जसले अहिले आफुलाई कथित महाअभियन्ता बनाएर नागरिक मुक्तिका लागि आन्दोलन छेडिरहेका छन् । तर पैसाकै कारण दुर्गा प्रसाईँको अस्पतालले मानवियता बिर्सिएर घाइतेको अवस्थामाथि खेलवाड गरेको आफन्तीहरुको आरोप छ । तथापी मुख्यमन्त्रीले घाइतेको ज्यान तलमाथि भए, प्रहरी बोलाएर थुनाउनेसम्मको चेतावनी दिएपछिमात्रै हच्किएका प्रसाईंले अस्पतालबाट घाइतेलाई निकाल्न दिएका थिए ।

घाइतेहरुलाई अहिले नेपाली सेनाको स्काई ट्रकमार्फत काठमाडौं ल्याएर भर्ना गरिएको छ । कीर्तिपुर अस्पतालमा अहिले जलेको अनुहार, जलेका हातखुट्टा र शरीरसहित २५ जनाले उपचार गराईरहेका छन् । अस्पतालको जनशक्ति र स्रोतसहितको उपकरणले नपुग्ने भएपछि अमेरिकाबाट विशेषज्ञ चिकित्सकसहितको टोली मगाइएको छ । जुन पहिलो चरणको टोली आइतबार आइपुग्ने छ । जलेका बिरामीको उपचार निकै महंगो हुने र पर्याप्त उपकरण पनि नभएपछि विदेशी टीमसँग सहयोग मागिएको अस्पतालका बर्न विभाग प्रमुख डा. किरण नकर्मीले जनाए ।

अस्पतालका अनुसार बिरामीहरुलाई बचाउन हरसम्मको प्रयास गरिएको छ । अहिले ६५ प्रतिशतसम्म शरीर जलेका घाइतेहरुको अप्रेसन र उपचार गरिएको छ । शुक्रबार एकैदिन चारजनाको अप्रेशन गरिएको थियो । तर जलेका बिरामीको उपचार गर्ने देशकै यही एउटा गतिलो अस्पताल भएपनि अभावैअभावमा काम भइरहेको प्रा.डा. शंकरमान राई बताउँछन् ।

घाइतेको अवस्था र उपचारबारे जानकारी लिन शुक्रबार एमाले अध्यक्ष केपी शर्मा ओली अस्पताल पुगेका थिए । डाक्टरको बिफ्रिङ र घाइतेको अवस्था बुझेपछि चिन्तित देखिएका ओलीले उपचारका लागि सरकारले हरसम्भव प्रयास गर्नुपर्ने बताएका छन् । उनीहरूकाे उपचार राज्यले गर्नुपर्ने ओलीकाे भनाइ छ ।

बिहिबार घाइतेबारे जानकारी लिन स्वास्थ्यमन्त्री मोहनबहादुर बस्नेत पनि अस्पताल पुगे । शुक्रबार खेलकुद मन्त्री डिगबहादुर लिम्बुसमेत अस्पताल पुगेर उपचारमा कुनै कमि नआउने आश्वासन दिएर फर्किएका छन् । तथापी प्रधानमन्त्री पुष्पकमल दाहाल प्रचण्डले अस्पतालमा पाइला नटेकेको आफन्तीहरुको गुनासो छ । घाइतेका परिवारहरुले उपचार राज्यले निशुल्क गरिदिनुपर्ने माग गरिरहेका छन् ।

नेपालमा नेताहरुले जलेर घाइते हुन वित्तिकै रातारात विदेशमा लिने चलन छ । अहिले नागरिक जल्दा सुविधासम्पन्न अस्पतालसम्म पुर्‍याउने चेष्टा सरकारले गरेको छैन । यो नेता र जनताबीच गरिएको विभेद हो । चिकित्सककै बलमा बचाउने प्रयास भएपनि उपकरण अभाव जस्ता समस्या झन बढ्दै गएको छ ।

०००

प्रकाशित समय : १२:०० बजे