पोखराको साहित्यलाई नै अनौठोसँग व्यङ्ग्य गर्ने गरी एक व्यक्तिले उपाधिमाथि उपाधि स्वःघोषणा गरेर सम्मान थाप्ने गरेका छन् । देशभक्त कुँवर नाम गरेका उनले केही समयअघि १२ वटा उपाधिको स्वःघोषणा गरेका थिए । उनी आबद्ध विभिन्न संघ संस्थाहरूले उनलाई १२ वटा उपाधिबाट सम्मानित गरे ।

हरेक संस्थाले उनलाई नगद ५० हजार, सम्मानपत्रले सम्मान गरेका थिए । साहित्य सम्राट्, वाङ्मय सम्राट्, शब्द सम्राट्, सिर्जना सम्राट्, लेखक सम्राट्, रचना सम्राट्, महासाहित्यकार, बहुआयामिक व्यक्तित्व, संगीत मणिरत्न, दिव्य गायक, युग सञ्चारमणि र दुर्लभ महामानव उपाधि उनले स्वघोषणा गरेर सम्मान लिएको आरोप उनीमाथि छ ।

‘पुरस्कारको राशि आफैँ प्रायोजन गर्ने र सम्मान गर्न लगाइएको हो । यसले पोखराको साहित्यमै एक खालको कालो पोतिएको छ,’ एक अग्रज साहित्यकार भने, ‘उपाधिको स्वःघोषणा गर्ने र प्रायोजित पुरस्कार लिने अनौठो चलनको विकास भयो ।’

तत्कालीन समयमा सम्मान गर्ने संस्थाहरूमा इन्याल्क नेपाल (अंग्रेजी प्रौढ साक्षरता अभियान), इन्याल्क नेपाल काठमाडौँ र पोखरा शाखा, उन्नतिशील वाङ्मय प्रतिष्ठान, बैदाम वाङ्मय प्रतिष्ठान, रुपाङ्कन साहित्य परिवार, श्रीवृद्धि साहित्य परिवार, श्री ऐतिहासिक कुँवर तथा राणा सांस्कृतिक समाज, सनलाइट मिडिया टे«निङ सेन्टर, कारवी फाइनान्सियल एजेन्सी काठमाडौँ, काभिन ग्राफिक्स डिजाइनिङ एण्ड सोलुसन र माछापुच्छ्रे नृत्य प्रशिक्षण तथा सांस्कृतिक परिवार थिए ।

त्यसअघि चितवनमा उनी साहित्यिक राष्ट्रनायक उपाधिबाट सम्मानित भएका थिए । गत बुधबार उनले एकैदिन ३ वटा उपाधिमा सम्मान पाए । काव्य सम्राट्, कविता सम्राट् र कवि सम्राट् उपाधिबाट उनी सम्मानित भएका हुन् । उनले सोही दिन सोलुसन साहित्य पुरस्कार, कुँवर वीरखलक पुरस्कार र माछापुच्छ्रे सांस्कृतिक पुरस्कार पनि पाए । शिक्षाविद् जोर्ज जोन, प्राडा बुद्धि बहादुर थापा र वरिष्ठ गायिका बाबा राणाले उनलाई एकैपटक सम्मान गरे । तीनैवटा सम्मानको राशि ३ लाख छ । गत भदौ ३१ गते भावना सम्राट् पुरस्कार पाएका थिए । अर्को अनौठो के छ भने, यति धेरै उपाधिबाट सम्मानित व्यक्तिको सम्मानमा भने मुस्किलले १२–१५ जना उपस्थित भएका छन् ।

प्रकाशित समय : ०६:३३ बजे