केटीएम इन्टरनेशनल ट्रेडिङ प्रालिले छिट्टै नयाँ विद्युतीय ब्रान्ड नेपालमा भित्र्याउने भएको छ । कम्पनीले चीनमा निर्मित ‘सुन्रा’ ब्रान्डका दुई वटा विद्युतीय स्कुटर नेपालमा भित्र्याउन लागेकाे हाे ।

कम्पनीले सुन्राको विद्युतीय हक र रोबो एस मोडल सार्वजनिक गर्ने जनाएको छ । यी स्कुटरहरूमा सुन्राकै मोटर जडित छन् । रोबो एसमा जडित मोटरले ३ हजार किलोवाटको पावर र हकमा जडित मोटरले १८०० किलोवाट पावर दिने बताइएको छ ।

रोबो एस कम्पनीको हाइ-स्पीड सेग्मेन्टको स्कुटर हो । यसको टप स्पीड ८० किलोमिटर प्रतिघण्टाको हुनेछ । यसले एक पटकको पूरा चार्जमा १३५ किलोमिटरको रेन्ज दिने अनुमान छ ।

त्यस्तै हक भने कम्पनीको मोपेड सेगमेन्टअन्तर्गत पर्छ । यो लिथियम ब्याट्री प्याक विकल्पमा उपलब्ध हुने बताइएकाे छ । यसको टप स्पीड ४५ किलोमिटर प्रति घण्टाको हुनेछ भने एक पटकको पूरा चार्जमा ६५ किलोमिटर देखि १३० किलोमिटरसम्मको रेन्ज दिने ब्याट्री विकल्पमा उपलब्ध हुनेछ ।

कम्पनीका सेल्स एन्ड मार्केटिङ प्रमुख विवेक सिंहका अनुसार सुन्ना ब्रान्डको स्कुटर नेपालमा सन् २०२३ को फेब्रुअरीमा सार्वजनिक गरिने अपेक्षा छ । यी मोडलहरूको बजार मूल्य नतोकिए पनि दुई लाख ४० हजारदेखि तीन लाख ८० हजार रूपैयाँ पर्ने अनुमान छ ।

हाल केटीएम इन्टरनेशनल ट्रेडिङले बेनेलीका बाइक तथा स्कुटरको बिक्री एवं वितरण गर्दैछ ।

प्रकाशित समय : १६:५५ बजे