सेयर बजार १५ अंकले बढ्दा सर्वाधिक मूल्य बढ्ने यी १० कम्पनी

सेयर बजार परिसूचक नेप्से साताको अन्तिम दिन बिहीबार पनि बढेको छ । आइतबार ८८ अंकले बढेर सोमबार र मंगलबार क्रमशः ६ र ३ अंक घटेको बजार बुधबार १३ र बिहीबार १५ अंकले बढेको हो । अन्यबाहेकका सबै समूह उकालो लागेपछि समग्र बजार परिसूचक १५.९१ अंकले बढेर २१९४.४८ अंकमा उक्लिएको छ । व्यापार ४.७९ र उत्पादनमूलक २.०६ अंकले बढेको बजारमा बाँकी समूह सामान्यमात्र बढेका छन् । बिहीबार २०८ कम्पनीको १ करोड १७ लाख ६७ हजार ४९२ कित्ता सेयर ५ अर्ब ८७ करोड ४७ लाख रुपैयाँबराबरमा किनबेच भएको छ । यो कारोबार रकम बुधबारको तुलनामा बढी हो । बुधबार ४ अर्ब ४२ करोड ५४ लाख रूपैयाँको सेयर खरिद‑बिक्री भएको थियो । बजार उकालो लाग्दा मल्टीपर्पोज फाइनान्सको सेयर मूल्यमा सकारात्मक सर्किट लागेको छ । त्यस्तै मिर्मिरे माइक्रोफाइनान्स, आईएमई जनरल इन्स्योरेन्स, नारायणी डेभलपमेन्ट बैँक र प्रभु लाइफ इन्स्योरेन्सको सेयर मूल्य ९ प्रतिशतभन्दा धेरैले बढेको छ । त्यस्तै गुर्खाज फाइनान्सको सेयर मूल्य ८.१३ प्रतिशतले बढेको छ भने सिभिल लघुवित्त, एनएलजी इन्स्योरेन्स, हिमालयन डिस्टिलरी र एभरेस्ट इन्स्योरेन्स कम्पनी पनि ७ प्रतिशतभन्दा धेरैले बढेर सर्वाधिक मूल्य बढ्ने १० कम्पनीको सूचीमा परेका छन् । बिहीबार प्रभु बैँकको सर्वाधिक ३१ करोडको सेयर कारोबार भएको छ । त्यस्तै नेपाल रिइन्स्योरेन्स कम्पनीको २७ करोड, चिलिमे हाइड्रोपावरको २४ करोड, नेपाल लाइफ इन्स्योरेन्सको २३ करोड, एनआईसी एसियाको २२ करोड र हिमालयन डिस्टिलरीको २० करोडको सेयर कारोबार भएको छ ।