fbpx
Rashifal Ad
Nepal Mediciti

गृहपृष्ठ इन्द्रध्वजोत्थानको साइत मंगलबार बिहान ९:१७ बजे

इन्द्रध्वजोत्थानको साइत मंगलबार बिहान ९:१७ बजे

फाइल तस्बिर

नेपाल पञ्चांग निर्णायक समितिले यस वर्षको इन्द्रध्वजोत्थान (लिंगो ठड्याउने) साइत यही भदौ २४ गते मगलबार बिहान ९:१७ बजे रहेको जनाएको छ ।

इन्द्रध्वजोत्थान इन्द्रजात्राको महत्वपूर्ण दिन हो । भक्तपुरको चित्तपोल सामुदायिक वनबाट ल्याइएको इन्द्रजात्राको लिंगो शुक्रबार बिहान ९:३५ बजे भोटाहिटीबाट वसन्तपुरतिर प्रवेश गराइएको थियो । पहिले भोटाहिटीभन्दा भित्रको क्षेत्रलाई मात्र नगर भनिने गरेकाले लिंगो नगर प्रवेश गराउने भन्ने गरिएको छ ।

यही भदौ १५ गते बिहान ११:७ बजे वनयात्रा गरी त्यसै दिन राति ८:१ बजे विधिपूर्वक बलि पूजासहित लिंगोका लागि रुख काट्ने साइत दिइएको समितिका अध्यक्ष एवं धर्मशास्त्रविद् प्रा. डा. रामचन्द्र गौतमले जानकारी दिए । समितिले दिएको साइतअनुसार नै लिंगोका लागि रुख काटेर ल्याइएको हो ।

केन्द्रीय मानन्धर संघको नेतृत्वमा भक्तपुरको चित्तपोल सामुदायिक वनमा विधिपूर्वक उपयुक्त रुख छानी लिंगोका लागि काटिन्छ । यसका लागि नेपाली सेनाको पनि सहयोग लिने गरिएको गुठी संस्थान शाखा कार्यालय काठमाडौँका प्रमुख शैलेन्द्र पौडेलले बताए ।

इन्द्रजात्राको मुख्य दिन यही भदौ २७ गते दिउँसो ४:०० बजे श्रीगणेश, श्रीभैरव र श्रीकुमारीको रथयात्रा सुरु हुन्छ । त्यसदिन राष्ट्रपति विद्यादेवी भण्डारीले गद्दी बैठकबाट श्रीगणेश, श्रीभैरव र श्रीकुमारीको दर्शन गरी दान दक्षिणापछि रथयात्रा सुरु गर्न अनुरोध गर्ने परम्परा छ । त्यस दिन तल्लो टोलमा कुमारी यात्रा गराइनेछ ।

भदौ २८ गते शनिबार माथिल्लो टोलमा रथयात्रा हुनेछ । भदौ ३१ गते महिलाले मात्र रथ तानी नानीचा यात्रा गराइने संस्थानले जनाएको छ । त्यसै दिन राति करिब ८:०० बजे जीवित देवी कुमारीसँग राष्ट्रपति भण्डारीले टीका प्रसाद ग्रहण गर्नेछिन् । टीका प्रसाद ग्रहण गरेपछि राष्ट्राध्यक्षले खड्ग साट्ने परम्परा छ । आगामी असोज १ गते बिहान ५:३५ बजे लिंगो ढाल्ने (इन्द्रध्वज पातन) साइत दिइएको समितिले जनाएको छ ।

लिंगो ढालेपछि वसन्तपुरबाट तानेर टेकु दोभान लगी वाग्मतीमा सेलाइनेछ । यसरी असोज १ गते तीन साता लामो इन्द्रजात्रा समाप्त हुनेछ । इन्द्रजात्राका लागि संस्थानले मात्र ३० लाख रूपैयाँ खर्च गर्ने जनाएको छ । भक्तपुरबाट लिंगो किनेर ल्याउनेदेखिका काममा बजेटको आवश्यकता पर्छ । जात्रामा संलग्न हुनेलाई काठमाडौँ महानगरपालिकाले पनि बजेटको व्यवस्था गर्ने गरेको छ । (रासस)

प्रकाशित समय १५:४५ बजे

vayodha-hospital
NCC Bank

प्रतिक्रिया दिनुहोस्

सम्बन्धित शीर्षकहरु