fbpx
corona information

गृहपृष्ठ डाक्टर कुर्दै बित्छ दिन

डाक्टर कुर्दै बित्छ दिन

सुदूरपश्चिमकै रेफरल अस्पतालका रुपमा रहेको सेती प्रादेशिक अस्पतालमा कार्यरत अधिकांश चिकित्सकले अस्पताल समयमा बाहिर समय दिन थालेपछि सेवाग्राही मर्कामा परेका छन् । अस्पतालका मेडिकल सुपरिटेन्डेन्ट हेमराज पाण्डेसहित अधिकांश चिकित्सक आफ्नै क्लिनिक सञ्चालन गरेर काम गरिरहेका छन् भने धेरै चिकित्सकले बाहिरका क्लिनिकमा समय दिने गरेका छन् ।

अस्पताल समयमै पनि चिकित्सकले बाह्य क्लिनिकमा समय दिन थालेपछि सेवाग्राहीले चिकित्सक खोज्दै भौंतारिनुपर्ने बाध्यता छ । अतिरिक्त सेवामा कार्यरत चिकित्सकका लागि १० बजेदेखि ३ बजेसम्म अनिवार्य समय तोकिए पनि चिकित्सक १ बजेपछि भेटिँदैनन् । आकस्मिक कक्षमा दुई जना चिकित्सक अनिवार्य गरे पनि एचए तथा स्टाफ नर्समात्रै भेटिन्छन् ।

चिकित्सकले अस्पतालमा समय नदिने गुनासो विगतबाटै उठे पनि यसको समाधान हालसम्म हुनसकेको छैन । चिकित्सकले अस्पताललाई पूरा समय नदिँदा सेवाग्राहीले सामान्य सेवा लिन पनि हप्तौं अस्पताल धाउनुपर्ने बाध्यता छ । प्रदेशका नौ वटै जिल्लाका बिरामीको गन्तव्य हो सेती अस्पताल । सोही सेती अस्पतालमा भएको सेवासमेत बिरामीले नपाउँदा महँगो शुल्क तिरेर निजी क्लिनिकमा उपचार गर्नुपर्ने बाध्यता छ ।

बाजुराको पाण्डुसैनबाट श्रीमतीको उपचारका लागी सेती अस्पताल पुगेका देवी लुहारले हालसम्म उपचार सेवा पाएका छैनन् । पेटको पत्थरी भएपछि श्रीमतीलाई पाँच दिनअघि उनले सेती अस्पताल पुर्‍याएका थिए । पाँच दिनदेखि रगत जाँच र पिसाब जाँच गर्नमै ठिक्क भएको उनी बताउँछन् ।

पाँच दिन अस्पताल धाउँदासम्म उपचार हुने नहुनेसमेत स्पष्ट नभएपछि उनी चिन्तित छन् । आर्थिक अवस्था कमजोर भएका लुहार छोराछोरी एक्लै घरमा छोडेर सेती अस्पताल पुगेका थिए । यता श्रीमतीको उपचारको ठेगान छैन उता छोराछोरी भोकभोकै बस्न बाध्य भएको भन्दै लुहारले दुखेसो पोखे ।

त्यस्तै धनगढीको फूलबारीबाट खुट्टाको हड्डीसम्बन्धी समस्या लिएर बिहानै सेती अस्पताल पुगेका जितबहादुर अधिकारीले पनि साँझसम्म सेवा पाउन सकेनन् । बिहान १० बजेदेखि लाममा बसेका अधिकारीले डाक्टरको पर्खाइमा ३ बजेसम्म कुरे तर डाक्टर भेटिएनन् । यो समस्या के कारण आएको हो त्यो थाहा नभए पनि बिरामीले समयमा उपचार पाए राम्रो हुने अधिकारीले बताए ।

दार्चुलाको नौगाड गाउँपालिका ५ बाट शरीर दुखाइको समस्या लिएर सेती अस्पताल पुगेका गगन टमाटाले नि पाँच दिनसम्म उपचार पाउन सकेनन् । आफूलाई अस्पतालको बारेमा धेरै जानकारी नभए पनि प्रदेशकै ठूलो सरकारी अस्पतालको नाम सुनेकाले सेती अस्पताल पुगेको उनले बताए । तर, पाँच दिनसम्म धाए पनि उपचारबारे पत्ता नलागेको उनले बताए ।

यसबारे अस्पताल प्रशासनमा बुझ्न खोज्दा मेडिकल सुपरिटेन्डेन्टसँगै सूचना अधिकारी पनि भेटिएनन् । अस्पताल विकास समितिका अध्यक्ष दुर्गा जोशी भने कार्यकक्षमै भेटिए । सो गुनासोको सम्बोधन गर्न मेडिकल सुपरिटेन्डेन्टसँगै सबै चिकित्सकलाई आग्रह गरिएको अध्यक्ष जोशीले बताए । त्यसको जिम्मा मेडिकल सुपरिटेन्डेन्टको भए पनि आफूले उनीहरुलाई उपचारमा सहज गर्न आग्रह गरिरहेको अध्यक्ष जोशीले बताए ।

प्रकाशित समय १६:३५ बजे

vayodha-hospital

प्रतिक्रिया दिनुहोस्

सम्बन्धित शीर्षकहरु