fbpx
corona information

गृहपृष्ठ पाकिस्तानमा बम विस्फोट हुँदा सातको मृत्यु, ११२ जना घाइते

पाकिस्तानमा बम विस्फोट हुँदा सातको मृत्यु, ११२ जना घाइते

पाकिस्तानमा शक्तिशाली बम विस्फोट हुँदा मंगलबार सात जनाको मृत्यु भएको छ । बम विस्फोटमा परी ११२ जना घाइते भएका छन् ।

पाकिस्तानी सञ्चारमाध्यमका अनुसार स्थानीय जमिया जुबैरिया मदरसामा इस्लाम धर्मका बारेमा विशेष कक्षा सञ्चालन भइरहेका बेलामा विस्फोट भएको हो । विस्फोटमा परी मृत्यु भएका र घाइते भएका सबै विद्यार्थी हुन् ।

घटनास्थलमा शंकास्पद झोला भेटिएको र घटनाका बारेमा पूर्ण अनुसन्धान सुरु गरिसकिएको प्रहरी अधिकृत वाक्वार अजिमले जानकारी दिएका छन् । विस्फोटका कारण कक्षा सञ्चालन भइरहेको भवन र हल क्षतिग्रस्त भएको भिडियो पाकिस्तानी सञ्चारमाध्यमले देखाएका छन् ।

विस्फोटनका लागि पाँच किलो विस्फोटक पदार्थ प्रयोग गरेको पाइएको प्रारम्भिक अनुसन्धानबाट देखिएको प्रहरी अधिकारीहरुले जानकारी दिएका छन् । घाइते भएकामध्ये केहीको अवस्था गम्भीर रहेको जनाइएको छ ।

घटनामा परी केही शिक्षक र कर्मचारीसमेत घाइते भएका छन् । घाइते भएका विद्यार्थी अधिकांश २५ वर्षको हाराहारीका छन् । घाइते भएकामध्ये केही विद्यार्थी अफगानी हुन् ।

पाकिस्तानी प्रधानमन्त्री इमरान खानले घटनाप्रति गहिरो दुःख व्यक्त गर्दै शोक सन्तप्त परिवारजनप्रति समवेदना व्यक्त गरेका छन् घाइतेहरुको शीघ्र स्वास्थ्यलाभको कामना गरेका छन् ।

प्रकाशित समय १९:४८ बजे

प्रतिक्रिया दिनुहोस्

सम्बन्धित शीर्षकहरु